Babai i Orest Sotës, biznesmeni Lefter Sota, dërgon në prokurori një material të plotë të të gjitha faturave dhe transaksioneve financiare të kryera prej tij gjatë viteve të fundit.

Sekuestrimi i 863 mijë eurove të të birit në 1 nëntor, duket se kanë detyruar biznesmenin e hekurit që të dorëzojë në Prokurorinë e Krimeve të Rënda informacion mbi burimin pasuror të 863 mijë eurove, të sekuestruara në makinën me të cilën po udhëtonte djali i tij Orest Sota në 1 nëntor.

I kontaktuar nga ABC Neës, biznesmeni Lefter Sota theksoi se memo-ja që iu dorëzua organit të akuzës, kishte të bashkëngjitur faturat financiare dhe historikun e transfertave bankare.

Aktualisht Orest Sota po qëndron në masën e sigurisë me arrest me burg. 25 vjeçarit së bashku me sasinë e konsiderueshme të parave iu sekuestruan edhe 2 patentat e lundrimit të ish-ministrit të Brendshëm Saimir Tahiri.

Ndërkohë, Prokuroria e Krimeve të Rënda ende nuk ka marrë një vendim përfundimtar nëse do të bashkojë hetimin kundër Orest Sotës me dosjen “Habilaj”, ku po hetohet edhe ish-ministri i Brendshëm Saimir Tahiri.