Transmetuar më 20-11-2017, 10:45

Ministri i Brendshëm Fatmir Xhafaj thotë se, Shqipëria ka patur dhe vazhdon të ketë një angazhim aktiv, përsa i përket përmirësimit të standardeve, lidhur me mbrojtjen dhe respektimin e të drejtave dhe lirive të fëmijëve, për të rritur standartet e trajtimit të fëmijëve.

Duke folur ditën e sotme gjatë prezantimit të Projekt-Strategjisë së Drejtësisë për të Mitur, ai u zotua për përmirësimin e infrastrukturës në të gjitha Komisariatet e Policisë, me qëllim krijimin e ambienteve miqësore dhe të përshtatshme për marrjen në pyetje të të miturve dhe sigurimin e provave, pajisjen e tyre me mjetet e nevojshme për të realizuar këtë objektiv, mjediset e pritjes në Komisariate të jenë të ndara nga mjediset e të rriturve.

Po ashtu u ndal në përmirësimin e kurrikulave të trajnimit në Akademinë e Sigurisë për formimin e punonjësve të policisë, si edhe planifikimi dhe zhvillimi i trajnimeve të posaçme për rritjen e kapaciteteve të stafit policor të dedikuar për punën me të miturit lidhur me njohjen e standardeve ndërkombëtare të ratifikuara në fushën e të drejtave dhe mbrojtjes së fëmijës.

“Trajnimin e punonjësve të policisë në lidhje me programet specifike të trajtimit dhe rehabilitimit të të miturve viktima të torturës, trafikimit njerëzor, dhunës seksuale dhe dhunës në familje. Të miturit në sistemin e drejtësisë penale përbëjnë një kategori vulnerabël, ndaj edhe mbrojtja e tyre duhet dhe do të të jetë një nga objektivat kryesorë të Policisë së Shtetit dhe jo vetëm. Si ministër i Brendshëm, kam bindjen se puna e përditshme e organeve të Policisë së Shtetit, veçanërisht të asaj pjese që ka kontaktin më të parë dhe të drejtpërdrejtë me të miturit, do të duhet të orientohet në të ardhmen detyrimisht drejt disa qëllimeve madhore”, u shpreh Xhafaj.

Ai nënvizoi se policia duhet të respektojë të drejtat dhe liritë si dhe dinjitetin e të miturve që janë në kontakt me Policinë, duke mbajtur në konsideratë moshën, pjekurinë e tyre, nevojat e veçanta, nivelin e të kuptuarit, gjuhën, praninë e avokatit, prindit, psikologut, etj. Strukturat e Policisë duhet të ndërmerren të gjitha veprimet në interesin më të lartë të fëmijës.

Në dokumentin e prioriteteve dhe objektivave të Ministrisë së Brendshme për këtë mandat të ri ndër të tjera, tha se është parashikuar ndryshimi cilësisht i sistemit të kontrollit të territorit dhe policimit në komunitet, në funksion të parandalimit të kriminalitetit dhe shkeljeve të ligjit, duke synuar uljen në mënyrë të ndjeshme të numrit të personave të përfshirë në vepra penale të lehta dhe shkelje të ligjeve dhe sidomos për uljen e numrit të të miturve dhe të rinjve të përfshirë në aktivitet kriminal; Rritjen e vëmendjes për parandalimin dhe trajtimin e veprave penale të lehta dhe sjelljeve anti-shoqërore, reagimin më efikas ndaj rasteve të dhunës në familje dhe abuzimeve me të miturit, duke synuar që të dëmtuarve t’u sigurohet një trajtim i kujdesshëm dhe referim për asistencë në institucionet përkatëse.

Në masat konkrete ndër të tjera të parashikuara renditi:

-Fuqizimin e shërbimit të psikologut/sociologut në strukturat e Policisë së Shtetit;

-Intensifikimin e programeve të edukimit publik në shkolla përmes një bashkëpunimi shumë më efektiv me institucionet e arsimit dhe organizatat e shoqërisë civile;

-Zhvillimin e fushatave ndërgjegjësuese në lidhje me rëndësinë e masave parandaluese, kryesisht në drejtim të përfshirjes në kriminalitet apo përdorimin nga krimi i organizuar sidomos të të miturve dhe të rinjve;

Xhafaj tha ndër të tjera se Policia e Shtetit gjatë ushtrimit të detyrave të saj do të duhet të tregojë se drejtësia miqësore për të miturit nënkupton garantimin e respektit dhe efektivitetin e zbatimit të të gjithë të drejtave të fëmijëve, në nivelin më të lartë të arritshëm. /a.y/noa.al