Bashkia e Tiranës ka vendosur në rrugët kryesore fotografitë e 100 gjimnazistëve më të mirë. Në kuadër të nismës së propozuar nga kryebashkiaku Veliaj, në tabelat që përdoren për të reklamuar bizneset, janë vënë fotot e nxënësve më të mirë të shkollave në Tiranë, ku është shkruar edhe emri i nxënësit të talentuar.

Imazhet e tyre janë shpërndarë edhe në rrjetin social Twitter nga Kryetari i Bashkisë, Erion Veliaj, i cili thekson se aseti më i madh i qytetit janë njerëzit.

Duke vlerësuar rezultatet e arritura nga ata në mësime, Veliaj shprehet se gjimnazistët ekselentë janë burim frymëzimi për gjithë qytetin, se puna dhe përpjekjet nuk shkojnë dëm.

“Aseti më i madh i një qyteti nuk janë rrugët, ndërtesat e makinat, janë njerëzit! Ndaj këtë fundvit kemi “stolisur” Tiranën me 100 gjimnazistët me mesataren 10 për të frymëzuar qytetin se puna e përpjekja nuk shkon kurrë dëm! Bravo”, shkruan Veliaj. 

Me ardhjen në krye të Bashkisë së Tiranës, Veliaj riktheu dhe bursat për nxënësit ekselentë duke promovuar dhe mbështetur arsimimin e brezit të ri dhe sidomos të atyre që kanë treguar vullnet për të shkëlqyer në mësime, ku mbështetet edhe e ardhmja e sigurtë e Tiranës dhe e brezit të ardhshëm. /b.l/noa.al/