Transmetuar më 14-02-2018, 13:54

Kryetari i Partisë Demokratike, Lulzim Basha ka reaguar mesditën e sotme pas takimit të kryeministrit Edi Ramës me senatin e Universitetit të Tiranës. 

Ai e ka quajtur Ramën "injorant" dhe thotë se pedagogëve që kërkuan ballafaqim me të, iu është fshehur dhe i sulmon. Takimi i Ramës me pedagogët është një pamje e trishtë sipas Bashës, ndërsa është shprehur se ky është denigrimi më i madh që dëshmon pavarësinë false të universiteteve publike.

“Nuk ka pamje më të trishtë se një kryeministër i ulur në krye të vendit duke ju dhënë leksion profesorëve të ulur si nxënës në auditor, duke i marrë në pyetje e duke ju dhënë edhe lejen të flasin apo jo. Kryeministri që mbledh Senatin e Universitetit, kërcënon dhe fyen pedagogët, përqesh dhe denigron profesorët, është dëshmia e “pavarësisë” fallso të universitetit publik, ku rrogat i vendos ministri, strukturën e shkollave e vendos ministri, programet i vendos ministri, madje edhe ditën e fillimit të vitit shkollor e vendos ministri”, u shpreh Basha.

Më tej ai shton se pedagogëve që kërkuan ballafaqimin, Rama ju është fshehur dhe i sulmon e ju hakërrehet nga frëngjia e bunkerit ku sipas tij ka futur përdhunshëm shumë nga të emëruarit e tij.

“Universiteti duhet të bëjë para, duhet të bëjë biznes, ju thotë kryeministri pedagogëve, sepse edhe universitetin ky e sheh si bizneset e ndërtimit me të cilët ndan paratë. Një kryeministër injorant që nuk kupton se dija dhe shkollimi nuk është mall si çdo mall tjetër dhe universitetet nuk janë firma ndërtimi është në krye të një qeverie që mbjell injorancë”, shton ai.

Kryedemokrati deklaron në fund të deklaratës së tij se ka vetëm një zgjidhje për arsimin e lartë: autonomi e plotë akademike, financiare dhe administrative. “Ka vetëm një zgjidhje për arsimin e lartë: universitete jo-fitimprurëse, jashtë kontrollit të qeverisë dhe të pronarëve”, tha Basha./b.l/noa.al/