Transmetuar më 14-02-2018, 15:06
Publicitet

Kryeprokurorja Arta Marku ka kërkuar përshpejtim të hetimeve për të gjitha çështjet që janë në ngarkim në Prokurorinë për Krime të Rënda.

Gjatë analizës së punës në këtë institucin, kreu i organit të akuzës tha se përshpejtimi i hetimeve nuk duhet të ndikojë në cilësinë e tyre.

“Për vetë specifikën e veprave penale që janë objekt i ndekjes penale nga Prokuroria për Krime të Rënda, ku shpesh ndërthuren organizatat apo grupet kriminale transnacionalë, kërkohen energji të reja për të ngritur më shumë nivelin e bashkëpunimit dhe bashkërendimit të punës me agjencitë e zbatimit të ligjit brenda vendit dhe veçanërisht me partnerët ndërkombëtarë.

Prokuroria e Përgjithshme nxit dhe mbështet përshpejtimin e hetimeve të të gjitha çështjeve nga prokurorët e Krimeve të Rënda. Kjo, pa e cenuar aspak cilësinë e hetimeve, por për shkak të ndjeshmërisë së lartë publike që kanë çështjet që hetohen prej jush. Prandaj, kërkohet kjo shpejtësi në plotësimin dhe standardizimin e protokolleve hetimorë”, tha Marku.

Kryeprokurorja e Përkohshme u kujtoi prokurorëve të Krimeve të Rënda pavarësinë që u garanton ligji, por sipas saj kjo pavarësi nuk duhet të përkthehet në anarki.

“Pavarësia e prokurorëve mbetet e pacenuar, si një e drejtë e njohur nga Kushtetuta dhe Kodi i Procedurës Penale. Por, kjo nuk do të thotë që të kalohet në anarki, përveçse kërkohet vëmendje dhe përkushtim maksimal në ushtrimin e ndjekjes penale dhe përfaqësimin e akuzës në gjykatë si dhe zbatimin rigoroz të rregullave procedurialë dhe rregullave të parashikuar në ligjin për organizimin e prokurorisë”, ishin fjalët e Arta Markut. /k.k/noa.al/

Loading...