Transmetuar më 20-02-2018, 23:08

Ish-kryeministri Sali Berisha ka folur sot në “Studio e Hapur” në “News24” edhe për drejtimin e Partisë Demokratike dhe drejtimin e saj sot nga Lulzim Basha. I akuzuar shpesh për pozicionin e tij autoritar dhe për moslejimin e lirisë së mendimit, Berisha tha se kurrë nuk i ka penguar njeriu mendimin dhe se nuk i ka kërkuar bashës apo Sokol Olldashit të kandidojë.

I pyetur për një emër që do e zëvendësonte Bashën, lideri historik i PD-së thotë se askush nuk është i pazëvendësueshëm.

Ai ka edhe një këshillë për PD-në, për të cilën thotë se duhet të kthejë të gjithë kontributet që prej vitit 10091, duke lënë të kuptohet edhe ata që u lanë jashtë listave në zgjedhjet e qershorit 2017.

Çfarë do ndryshonit në organizimin e PD në vite?

Në karrierën time në PD, unë jam marrë intensivisht kur kam qenë në opozitë, e pastaj jam marrë me Shqipërinë kur kam qenë në pushtet. Jam përpjek të bëj më të mirën, po gjithë kjo qeverisje ka kaluar përmes gabimeve, siç ishin piramidat tepër serioze, apo dhe gabime të tjera. Po unë jam marrë me Shqipërinë.

Duhet të linit liri mendimi në PD?

Nuk ka njeri të thotë se e pësova nga mendimi që shpreha. Njerëzit kanë të drejtë të shprehin mendimin e tyre. Kurrë s’i kam penguar njeriu mendimin. Dëshira ime më e madhe është që njeriu të më thotë mendimin siç e ka. Partia ka pasur procedura, të gjithë janë kthyer në kontributet e tyre reale në PD, ata njerëz kanë vënë gurë themeli në PD, por edhe në ndërtimin e këtij sistemi të ri.

Fryma e autoritarizmit që ju akuzojnë është se keni lënë partinë në duart e Bashës…

Nuk ka aspak të vërtetë. Unë edhe 100 herë garantoj çdo shqiptar se kurrë nuk i kam kërkuar Bashës apo Olldashit të kandidojnë. E vetmja gjë që them është që pse nuk kandiduan të tjerët. Unë nuk i thashë por nuk e pengova Bashën të kandidojë, as Olldashin. I lashë në garë. Asnjë lloj pengese. Nuk gjen një njeri të vetëm të thotë që nuk kandidova se nuk më la Berisha.

Në grupin parlamentar të PD a ka kush e zëvendëson Bashën?

Gjatë gjithë karrierës sime unë kam qenë i një besimi të thellë se Sali Berisha nuk është i pazëvendësueshëm dhe e kam thënë disa herë. Nuk di njeri të pazëvendësueshëm. Unë iu përkas atyre që një nga shkaqet themelore që kam vendosur t’i kundërvihem atij sistemi ka qenë ideja e të pagabueshmit dhe pazëvendësueshmit. Këto të dyja nuk i pranoja kurrsesi.

PD ka 5 vite në opozitë e duket sikur ka një mungesë besimi të demokratëve ndaj PD-së?

PD ka nevojë shumë të bashkojë të gjitha kontributet. E konsideroj këtë si një nga mekanizmat më të rëndësishëm të suksesit të saj. PD duhet të bashkojë të gjitha kontributet nga viti 1990 deri sot. Ato janë pa asnjë diskutim një thesar i madh kombëtar. Demokratët janë grupacioni politik me vlerat morale më të larta në shoqëri në kuptimin me drogën. Krimin e korrupsionit.

Ju po thoni se duhet të kthehen ata që u lanë jashtë listave?

Që nga 90 e deri sot. Këtu qëndron një potencial i madh i PD-së. PD duhet të bëjë gjithçka për të shpëtuar vendin nga ky narkoshtet që është unik në botë. Shpresë tjetër unë nuk di. Shpresa e vetme pastaj është të marrin rrugët e botës siç po i marrin.

Ju latë pas 8 vitet e qeverisjes që u anatemuan nga opozita e atëhershme. Duket sikur ka një marrëveshje mes të majtës dhe të djathtës për një lloj amnistie?

Në mënyrë absolute nuk pranoj krahasimin. Pse? Në 4 vitet e PD-së, ose në 8 vitet e saj, Shqipëria ka ndryshuar njëherë e përgjithmonë për të mos qenë ajo që ishte. Në Shqipëri u ndërtuan mbi 11 mijë km rrugë. Të gjitha përfunduan, përveç se nihilizmi i Edi Ramës nuk përfundon kurrë. Në Shqipëri u ndërtuan dhe rindërtuan mbi 1300 shkolla dhe kopshte dhe janë të gjitha në regjistër.

Në Shqipëri u ndërtuan 720 sisteme ujësjellës dhe kanalizime. Në Shqipëri u ndërtuan 14 impiante të përpunimit të ujërave të zeza sot nuk funksionojnë sepse bashkitë socialiste nuk paguajnë energjinë dhe i derdhin në det. Në Shqipëri kur erdhëm në pushtet ishte 4.8% përdorimi i internetit, e sollëm 64%. Kur erdhëm në pushtet ekzistonin 4 mln ullinj, lamë 11 mln kur ikëm. Këto i thashë sepse që të gjitha janë para të taksapaguesve. Në Shqipëri u rritën rrogat nga 12- deri në 150%. U dyfishuan pensionet e ulëta. Çfarë u bë këto 5 vite? Cila rrugë përfundoi?

Akordojnë para për Tiranë-Elbasan dhe akoma nuk përfundon?

E di pse?

Për shkakun tuaj?

Absolutisht jo. Pjesa që ndërtoi Sali Berisha është me çmimin rekord më të ulët. Nëse ka njeri që ka çmim më të ulët për tunel në Ballkan të vijë e të më thotë. Ku shkuan paratë e 5 viteve të taksapaguesve shqiptarë.