Rreth 1 vit më parë, një ngjarje e rëndë tronditi Tiranën. 22-vjeçari Marvi Mihali u vra me thika nga bashkëmoshatarët e tij për një karikues telefoni.

Por një vit më pas autorët janë ende të lirë, ndërsa prindërit e të riut kërkojnë drejtësi.

Babai i Marvit, ish-sportisti i njohur Pavllo Mihali u shpreh se nëse nuk do të ketë drejtësi për djalin e tij, ai do të bëjë vetëgjyqësi.

Sot ai ka depozituar kallëzim penal për prokurorin Artan Lulaj dhe oficerin e Policisë Gjyqësore, Kliton Zharri.

Babai i të riut kërkon nisjen e procedimit penal për gjyqtarët e Gjykatës së Tiranës, Bedri Qori dhe Sokol Pasho

“Nuk më shkonte kurrë në mendje që një prokuror si Artan Lulaj të ngjyente duart me gjakun e Marvit. I them këtij prokurori të shkosh në shtëpi dhe të përkëdhelësh fëmijët e tij. Të bëhesh palë me kriminelet, të rivrasësh sërish Marvin.

Ne jemi të shkatërruar komplet, na ka ndryshuar jeta totalisht. Dhimbja është e tmerrshme, çrenjëzore dhe çnjerëzore e bëjnë edhe këto vendime. Por unë besoj sërish në drejtësi.

Unë pres drejtësi nëse do të ketë edhe njerëz të mirë. Nëse ky shtet do të vendosë në krye njerëz të mirë. Mendoj se mbi të gjitha ne duhet të jemi njerëz, duhet të na dominojë zemra. Nëse do të realizohet kjo drejtësi, unë do të kem të drejtën të flas lartë në qiell me Mavrin. Nëse nuk realizohet, unë do të bëhem shembull në Shqipëri. Unë do të bëj vetëgjyqësi, mua nuk më duhet më jeta. Unë do të luftojë deri në ditën e fundit”, u shpreh babai i Marvit një ditë më parë në media./m.sh/noa.al/