Presidenti Ilir Meta nuk i ka shpëtuar pyetjeve të gazetarëve, nëse do e dekretojë emrin e Kryeministrit Edi Rama për ministër të Jashtëm.

“Kushtetuta është e para”, u përgjigj kreu i shtetit shkurt, në largim nga një aktivitet ku ishte i pranishëm ditën e sotme.

Teksa gazetarët i kanë kujtuar afatin e përmendur nga kreu i grupit parlamentar socialist Taulant Balla, për orën 17.00 kur nis seanca e sotme parlamentare, Meta është përgjigjur me ironi.

“Kush është ky? Kryetari i Komisionit të Sigurisë?”, tha Presidenti, duke u futur për në makinë.

Gjatë paradites së sotme, Balla i bëri thirrje kreut të shtetit që ti japë fund ngërçeve të dekreteve, para nisjes së seancës parlamentare të pasdites.

“Të gjithë kandidatët e propozuar nga Kryeministri i plotësojnë kriteret dhe janë profesionistë. Meta nuk mund të sillet si kreu alternativ i opozitës. Shpresoj që Meta të ketë përgjigje brenda orës 17:00”, u shpreh Balla.

Ai kërkoi që Presidenti të bazohet në Kushtetutë.

Me kërkesë të Kryeministrit Edi Rama, Kuvendi mblidhet sot në seancë të jashtëzakonshme, ku do të bëhet votimi i ministrave të rinj të kabinetit qeveritar.

Deri më tani emri i Edi Ramës si ministër i Jashtëm nuk është dekretuar ende nga Presidenti Ilir Meta, duke bërë që të mos përfshihet në votim.

Meta nuk dekretoi Gent Cakaj si ministër të Jashtëm, duke bërë që Kryeministri Edi Rama ta marrë vetë drejtimin e ministrisë së Jashtme. /a.y/noa.al

Rama ministër i Jashtëm, Balla thirrje Metës: Ke kohë deri në 17.00