Presidenti i Serbisë, Aleksander Vuçiç mbërrin këto ditë në Tiranë për një vizitë zyrtare.
Vuçiç do të qëndrojë më 8 e 9 maj në Shqipëri dhe do të ketë takime me zyrtarët e shtetit shqiptar.
Ai do të marrë pjesë dhe në samitin Brdo-Brioni, një iniciativë ballkanike.
Po ashtu z.Vuçiç mësohet se do të ketë një takim në Tiranë dhe me Përfaqësuesen e Lart të BE-së, Federica Mogherini.
Me Mogherinin, presidenti serb do të fokusojë bisedën mbi dialogun e mbetur pezull mes Prishtinës dhe Beogradit.
Më herët më 8 maj Vuçiç do të jetë në Romë për t’u takuar me zëvendëskryeministrin e Italisë, Matteo Salvini. Tema kryesore e këtij takimi do të jetë dialogu me Kosovën, shkruajnë mediat serbe.
Takimi mes Vuçiqit dhe Salvinit pritet të jetë i mbyllur për media.
Pasi të përfundoj ky takim, Vuçiq në mbrëmje udhëton për në Tiranë.
Autoritetet shqiptare nuk kanë dhënë asnjë informacion zyrtar mbi këtë samit të 8 e 9 majit.
Samiti i procesit Brdo-Brioni, u themelua në vitin 2010 nga kryeministrat e Kroacisë dhe të Sllovenisë të asaj kohe, për një vizion të përbashkët strategjik të një Europe të bashkuar, të lirë dhe të sigurtë.