Një tërmet i fuqishëm dhe me pasoja katastrofike goditi vendin më 26 nëntor.

Tërmeti shkaktoi 51 të vdekur dhe qindra të plagosur, ndersa edhe shumë dëme materiale, kryesisht në Durrës dhe në Thumanë por edhe në Tiranë.

Të shumtë ishin ata që u solidarizuan me shqiptarët në këto ditë të vështira.

Një debat i ashpër u zhvillua këtë mbrëmje në emisionin “Open” në Top Channel mes analistit Andi Bushati dhe ministres Elisa Spiropali, në lidhje me solidaritetin.

Debati nisi kur Bushati tha se Imami Elvis Naçi ka mbledhur para më shumë se qeveria sepse njerëzit nuk i besojnë qeverisë.

“Normalisht është e rëndësishme që të dihet nga vijnë ato lekët që thotë Spiropali për hir të transparencës. Ajo që është më shqetësuese është se Elvis Naçi grumbullon më shumë para se qeveria. Kjo do të thotë që qytetarët i besojnë më shumë një Imami, prifti quajeni si të doni, më shumë sesa qeverisë”,- tha Bushati.

“Qeveria nuk është shoqatë bamirësie. Qeveria ka mbledhur nga vendet partnere që janë solidarizuar me ne”,- ndërhyri Spiropali.

“Po e them në kontekstin e besueshmërisë. Unë si qytetar dhuroj tek Elvis Naçi dhe jo tek qeveria. E kupton ku ka shkuar puna. Elvis Naçi ka grumbulluar 10-fishin e qeverisë”,- iu kundërpërgjigj Bushati./a.k/noa.al/