Rajonet e kontrolluara nga Rusia të Ukrainës lindore dhe jugore njoftuan planet të martën për të filluar votimin këtë javë për t’u bërë pjesë integrale e Rusisë. Përpjekjet e bashkërenduara dhe të shpejta, po mbështeten nga Kremlini për të gëlltitur katër rajone.

Këto plane mund të krijojnë skenën që Moska të përshkallëzojë luftën pas sukseseve të Ukrainës në fushën e betejës, raporton noa.al duke cituar AP.

Planifikimi i referendumeve që nisin të premten në rajonet Luhansk, Kherson dhe ato pjesërisht të kontrolluara nga Rusia Zaporizhzhia dhe Donetsk erdhi pasi një aleat i ngushtë i presidentit rus Vladimir Putin tha se votimet janë të nevojshme dhe ndërsa Moska po humbet terren në pushtimin që filloi gati shtatë muaj më parë, duke rritur presionin ndaj Kremlinit për një përgjigje të ashpër.

Ish-presidenti Dmitry Medvedev, nënkryetari i Këshillit të Sigurimit të Rusisë i kryesuar nga Putin, tha se referendumet që bashkojnë rajonet në vetë Rusinë do t’i bënin kufijtë e rivizatuar "të pakthyeshëm" dhe do t’i mundësonin Moskës të përdorë "çdo mjet" për t’i mbrojtur ata.

Ministri i Jashtëm ukrainas Dmytro Kuleba i denoncoi votimet si mashtrim dhe shkroi në Twitter se "Ukraina ka çdo të drejtë të çlirojë territoret e saj dhe do të vazhdojë t’i çlirojë ato çfarëdo që Rusia të thotë".

Votomet, në territorin që Rusia tashmë kontrollon, janë të sigurta se do të shkojnë në rrugën e Moskës, por nuk ka gjasa të njihen nga qeveritë perëndimore që po fuqizojnë Ukrainën me mbështetje ushtarake dhe të tjera, duke ndihmuar forcat e saj të marrin një vrull në fushat e betejës në lindje dhe jug. /noa.al

Foto: AP