Tiranë- Prej disa kohësh tregu shqiptar po përballet me mungesë qepësh dhe trefishim të çmimit të tyre.

Mungesa i ka detyruar tregtarët që të marrin qepë nga Kina dhe Egjipti.

Ata thonë se blerësit ankohen për çmimin e lartë të qepëve të importuara, por kjo ishte zgjidhja e fundit për ta.

Blerësit ankohen për çmimin pasi është shumë i lartë. Vjet në këtë kohë 1 kg qepë kushtonte 60 lekë, ndërsa këtë vit mbi 160 lekë.

Ekspertët e bujqësisë thonë se sezonin e kaluar kishte një prirje që në vend të qepës të mbilleshin kultura të tjera si patate, misër dhe grurë.

Sipas tyre kjo gjë lidhet edhe me luftën në Ukrainë që solli një rritje të pazakonte të çmimeve të drithërave dhe që nxiti më pas fermerët shqiptarë të mbillnin drithëra.

Një tjetër arsye për mungesën e qepëve është edhe rritja e eksporteve drejt vendeve të rajonit.

Por kjo mungesë e qepëve në treg ka gëzuar fermerët që e mbjellin pasi ata po marrin çmimin e shumëkërkuar prej vitesh.

Ata thonë se qepët e vjetra dhe të thara shiten 2 mijë lekë (të vjetra) ndërsa me shumicë, me 160 lekë.