Transmetuar më 15-05-2023, 10:37

Mos prisni gjëra të mira pas kësaj. Ky rezultat nuk është i mirë as për ata që kanë fituar… Askush nuk fiton kur humbet llogjika demokratike.

Trishtim i madh është ky rezultat zgjedhor, me thënë të drejtën.

Një hap gjigand drejt legalizimit të shtetit partiak në vend. Këtë radhë me vendim popullor.

E di që shigjetat e sulmit i drejtohen opozitës, por nuk jam më i sigurtë nëse shqiptari i sotëm po kërkon apo jo alternativë politike.

Kam patur dyshimin, të cilin e kam shprehur rregullisht, se shqiptari i sotëm nuk po kërkon alternativë politike. Rezultati i zgjedhjeve më provon bindjen. Është më i thellë problemi sesa thjesht opozita jo bindëse. Vendimi popullor tejkalon gjykimin kritik ndaj opozitës aktuale. Po përballemi me ndjesinë popullore të rehatllëkut me një parti e një udhëheqës.

Njerëzit ndihen rehat me një parti që kontrollon gjithçka. Ndihen rehat në moçalin politik, pavarësisht se njërëzit ngjajnë si ngjala që nuk duan t’u thahet këneta.

Ngjala që majmen me aq ushqim sa u hidhet dhe, që bien një nga një në grep sa herë i hahet bosit. Liritë, të drejtat, pronën e bisnesin njerëzit i kanë dorëzuar me dëshirë te partia-shtet. Me votim masiv madje. Gjykatat pas kësaj janë "legjitime" të zbatojnë porosinë e shefit, që është pronar i çdo gjëje me vendim popullor. Na pëlqen apo jo, kështu është.

Mos prisni gjëra të mira pas kësaj. Ky rezultat nuk është i mirë as për ata që kanë fituar… Askush nuk fiton kur humbet llogjika demokratike.

Edhe Ai që hiqet si fitimtar, ka fituar belanë. Absolutizmi është bela e madhe. Nejse, ta gëzojë sundimin absolut mbi këtë vend! Mandati që ka marrë është i qartë. Me tallava dhe shihe sa u votua… ***

Natyrisht ky arsyetim nuk mund të shmangë marrjen e përgjegjësive për katastrofën politike dhe elektorale. Pavarësisht klimës mbytëse që partia-shtet ka vendosur në vend. Rezultati katastrofik nuk mbulohet dot me parregullsitë në zgjedhje. Debati mbi këto të fundit llogjikshëm nuk ngjit. Thelbi i çështjes është:

Përse opozita ka humbur lidhjen me popullin shqiptar?! Sot është koha e burrnisë dhe e kqyrjes së problemit real në sy. Natyrisht, le të mbarojë edhe numërimi, po nuk del më dhjamë nga ky plesht. Trishtim…