Tiranë, 21 qershor 2012, NOA- Sipas MeteoAlb, nesër që në orët e para të mëngjesit kthjellimet do të jenë të pranishme në të gjithë territorin e vendit, por duke ju afruar orëve të mesditës do të ketë kalime vranësirash të lehta në zonat malore lindore.

Ndërsa në pjesën e dytë të ditës do të ketë shtim të vranësirave në verilindje dhe juglindje të territorit duke rrezikuar rrebeshe shiu afat-shkurtra ndërsa e gjithë pjesa tjetër do të jetë nën ndikimin e motit të kthjellët dhe temperaturave të larta, situatë e cila do të vijojë edhe gjatë natës.

Për sa i përket situatës termike, temperaturat e ajrit do të pësojnë 2 gradë rënie në vlerat minimale po ashtu edhe në vlerat maksimale do të ketë një rënie të lehte të temperaturave.

Era do të fryjë mesatarisht me shpejtësi 32 km/h nga drejtimi jugor dhe jugperëndimor, kjo do të bëjë që dallgëzimi në det të jete 1 apo 2 ballë.

Europa

Vendet e Europës veriore dhe veriperëndimore do të jenë nën ndikimin e masave ajrore të paqëndrueshme për pasojë, vranësirat dhe shirat e dendur do të jenë dominuese. Po ashtu si pasojë e vendosjes së një qendre me presion të ulët atmosferik në verilindje të Europës do të bëjë që vendet e lindjes të jenë nën dominimin e vranësirave dhe rrebesheve të shiut.  E njëjta situatë e paqëndrueshme e motit parashikohet për rajonin e Balltikut, zonën e Alpeve dhe Ballkanin verior ku shirat do të jenë rrebeshe por afat-shkurtër, kjo si rezultat i temperaturave të larta.

Ndërsa prezenca e dy qendrave me presion të lartë atmosferik njëra në detin Mesdhe dhe tjetra në detin e zi do të kushtëzojnë në Europën jugore, rajonin e Mesdheut dhe Europën juglindore mot të kthjellët dhe temperatura të larta.

a.y/noa.al