Kiev, 1 korrik 2012, NOA Update – Kampionia e Botës dhe kampionia e Europës Spanja e ka nisur fuqishëm finalen e Euro 2012 duke shënuar dy gola në portën e Gigi Buffon, raporton agjencia e lajmeve NOA.al.

Pjesa e parë e finales së evropianit u mbyll me rezultatin 2-0 për Spanjën.

Ishte David Silva që i çoi në avantazh spanjollët me golin e mrekullueshëm të shënuar në minutën e 14’.

Rezultatin e dubloi Jordi Alba në të 41-ën.

Gjatë pjesës së parë të ndeshjes Spanja mbizotëroi lojën duke krijuar shumë raste në portën e Buffonm ndërsa Balotelli nuk shkëlqeu me sulmet e tij.

Pjesën e parë të finales Spanjë-Itali e ndoqi edhe kryeministri Berisha.

Pa protokoll, i veshur sportiv, kryeministri Berisha ishte sonte në mbrëmje një nga ndjekësit e shumtë të ndeshjes në lokalet e kryeqytetit.

Në shoqërinë e shumë të rinjve të forumit rinor të PD-së të mbledhur për të parë ndeshjen, kryeministri e ndoqi finalen mes emocioneve të sportdashësve të shumtë që këto dy ekipe kanë në Shqipëri.

Në bashkëbisedim me të rinjtë, kryeministri komentoi se ndonëse nuk i kishte ndjekur të gjitha ndeshjet, për shkak të një axhende të ngjeshur zyrtare, kompeticioni europian i futbollit sipas tij është një garë e emocioneve të forta, që karakterizohet gjithnjë nga dinamizmi dhe shpirti i garës.

I pyetur se për kë ekip do të bënte tifo në këtë finale, kryeministri Berisha komentoi se futbollin e ndjek për bukurinë e lojës dhe garën.

Ai nënvizoi sakaq se mbështet gjithmonë ekipin që luan më bukur dhe që meriton fitoren.

Teksa shihte ndeshjen kryeministri u shpreh se sot ndeshen sulmuesi më i mirë i botës me mbrojtjen më të mirë të botës.

Teksa shihte ndeshjen kryeministri u shpreh se sot ndeshen sulmuesi më i mirë i botës me mbrojtjen më të mirë të botës.

Për Mario Balotellin, Berisha tha se “është dhurata e Zotit për Italinë”.

mit/noa.al