Qeveria miratoi dje vendimin “Për miratimin e listës së barnave që rimbursohen nga Instituti i Sigurimeve të kujdesit shëndetësor dhe masën e mbulimit të çmimit të tyre”.

Vendimi, i propozuar nga Ministri i Shëndetësisë, ka si qëllim miratimin e listës së barnave që rimburosohen nga Instituti i Sigurimeve të kujdesit Shëndetësor dhe masën e mbulimit të çmimit të tyre.

Sikurse dhe listat e mëparshme, edhe kjo listë është konceptuar në bazë të klasifikimit ndërkombëtar të sistemit ATC (anatomik, terapeutik dhe kimik) dhe përmban 413 barna, duke përbërë kështu listën më të gjatë të barnave për rimbursim.

Në këtë listë është aplikuar masa e mbulimit të çmimeve të barnave, që varion nga 50 % deri në 100%, duke patur parasysh disa kritere shkencore, me qëllim që ti japë prioritet barnave të cilat përdoren për sëmundje të rënda;

Për sëmundje me rrezikshmëri të lartë për jetën; Për sëmundje të cilat shkaktojnë invaliditet; Për sëmundje që kanë rrezikshmëri për përhapje në shoqëri; Për sëmundje të cilat shkaktojnë shumë vuajtje; Për sëmundje kronike të cilat kërkojnë mjekim të zgjatur.