Vlorë, 5 gusht 2012, NOA- Aleanca Kuq e Zi u ndal në qytetin e Vlorës për të protestuar për sa i përket betonizimit të bregut.

Aktivistë të AK-së u mblodhën pranë zonës së ujit të ftohtë për të kundërshtuar betonizimin e bregdetit Jonian nga pallatet shumëkatëshe.

“Aleanca Kuq e Zi e konsideron bregdetin shqiptar pasuri kombëtare dhe jo private e qeveritare as të Sali Berishës dhe as të sekserëve të tij që sot janë mbuluar me petkun e pushtetit të korruptuar”, u shprehën aktivistët gjatë protestës.

Përfaqësuesit e Aleancës Kuq e Zi deklaruan se ndërtimi i pallateve shumëkatëshe në afërsi të bregdetit është një akt barbar dhe i pamëshirshëm i pushtetarëve që Shqipërinë e konsiderojnë jo tokën amë por tokën e pasurimit të dhjetë brezave të tyre në kurriz të shqiptarëve të zhytur në krizën ekonomike.

“Aleanca Kuq e Zi denoncon mbështetjet që Sali Berisha i ka dhënë dhe jep ministrave të tij të cilët kanë ndërtuar pallatet përtej limiteve teknike dhe natyrore në bregdetin Jonian më pak se njëqind metra larg detit. Për AK ky fakt nuk është asgjë më shumë se sa prova e mungesës së mëshirës që Sali Berisha ka për pasuritë kombëtare dhe prova jetike se ai lëshon lëvdatat për jugun sepse ka në planin e tij vetëm pastrimin e parave në kurriz të shqiptarëve. Aleanca Kuq e Zi denoncon “orgjinë” e klasës politike shqiptare e cila në qytetin e Vlorës është e prekshme dhe pranishme me prova konkrete ku janë ndërtuar pallate me paratë dhe pushtetin e demokratëve por pa harruar lejen e socialistëve”, u shprehën aktivistët e AK, raporton noa.a.

Aleanca Kuq e Zi u zotua para qytetarëve të Vlorës se duke nisur nga viti 2013 do t’i ktheje publikut bregdetin e Vlorës të marrë peng nga ministrat dhe pinjollët e Kryeministrit.

a.y/noa.al