Transmetuar më 28-02-2018, 17:16

Presidenti i Komisionit Evropian, Jean-Calude Juncker në një konference për media së bashku me presidentin Hashim Thaçi, ka ripërsëritur se Kosova duhet të ratifikojë marrëveshjen e demarkacionit nëse dëshiron të fitojë liberalizimin e vizave.

“Është esenciale që vendi i juaj të votojë së shpejti demarkacionin, është hap kyç i pashmangshëm, i rëndësishëm drejt liberalizimit të vizave, ku bashkëqytetarët tuaj shqiptarë e serbë do të jenë përfituesit e kësaj”, ka thënë Juncker.

Ai ka thënë se edhe luftimi i krimit dhe korrupsionit duhet të thellohet edhe më shumë, dhe se nuk është i kënaqur që kosovarët janë të vetmit që nuk mund të udhëtojnë lirshëm.

Presidenti i KE-së, ka folur edhe për Strategjinë e BE-së për Ballkanin Perëndimor ku ka thënë se kjo strategji shërben për thellimin e bashkëpunimit në mes vendeve të Ballkanit Perëndimor .

Nga ana e tij Presidenti Hashim Thaçi deklaroi se demarkacioni do të miratohet javën e ardhshme. "Nuk do të komentoj asgjë, sepse jam i bindur se marrëveshja do të ratifikohet ditëve të ardhshme. 

Jemi të bindur se pasi kjo të ndodhë, KE dhe zoti Juncker do të bëjnë punën e tyre, do të marrin vendimet e duhura dhe do t’i japin fund izolimit të qytetarëve të Kosovës”, u shpreh Thaçi.