Transmetuar më 17-04-2019, 16:20

Partia Demokratike kallëzon penalisht Policinë e Shtetit dhe Policinë Bashkiake pas dhunës së ushtruar ndaj banorëve te Bregu i Lumit, më 9 prill, por edhe sot.

Lajmi është bërë me dije nga ish-deputetja e PD-së, Jorida Tabaku, nëpërmjet një postimi në facebook, ku ka publikuar edhe dokumentin e padisë.

Ish-deputetja, Jorida Tabaku bën me dije se Partia Demokratike ka dorëzuar në Prokurori kallëzimim penal dhe kërkon marrjen e masave per sjelljen brutale, joligjore e johumane gjatë të gjithë periudhës kohore të gjashtë muajve të fundit por vecanerisht gjatë mëngjesit të 9 Prillit ku fëmijë, gra e të moshuar u dhunuan barbarisht në gjumë nga shteti që duhet ti mbrojë.

“Një i moshuar 76 vjeçar u operua ne kokë, dy zonja me gjymtyrë të thyera, gra e vajza në komisariat e një fëmijë vetëm 5 vjec përfundoi më komisariat. Kjo sjellje kriminale e policisë duhet të marrë menjëherë përgjigje ligjore dhe urdhëruesit nga Kryetari i Bashkisë, Ministri i Brendshëm deri te Kryeministri duhet të vihen para drejtësisë. Këto sjellje prej banditësh të policisë që dhunën e ka për qytetarët dhe jo për krimin duhet të marrin fund njëherë e përgjithmonë bashkë me bandën në pushtet.

Sa kohë që të vazhdojnë për aq kohë qytetarët jo vetëm nuk do të jenë të mbrojtur por do të gjenden nën dhunën e shtetit policor sic ndodhi sërisht sot. Shteti si hajdut shkoi në te gdhirë e dhunoi gra e fëmijë, largoi median e zaptoi banesat. Kjo sjellje duhet të marrë fund. Kjo sjellje prej pushtuesi e arroganti ndaj të dobtëve e te pambrojturve duhet te përfundojë.

Kam bindjen që ky kallëzim do të flejë ashtu si flejnë dosjet e korrupsionit e dosjet e krimit, ashtu si fshihen përgjimet e vjedhjes së zgjedhjeve e ashtu si fshihen sa e sa krime. Por e sigurte është që drejtësia vonon por nuk harron! Do te vijë dita kur këto shkelës ligji të vihen para drejtesisë”,- thotë Tabaku.

Më herët LSI kallëzoi penalisht edhe kreun e komisariatit nr.4 Agim Hoxha për dhunën ndaj një gruaje te Bregu i Lumit./b.l/noa.al/