Loading...
Raporti për lirinë e medias, Meta: Kambanë alarmi, t’i jepet fund presionit
Transmetuar më 18-04-2019, 16:02

Pas raportit të “Reporter pa kufij” për lirinë e medias, ka reaguar kreu i vendit Ilir Meta, ku Shqipëria kishte rënë me 7 vende nga viti i kaluar.

Kreu i Shtetit e cilëson një kambanë alarmi që duhet t’i zgjojë të gjithë dhe dënon dhunën ndaj gazetarëve. Ai kërkon që përgjegjësit të vihen para drejtësisë e t’i jepet fund çdo shantazhi apo presioni ndaj mediave.

“Me shqetësim të thellë përcolla sot konkluzionet e organizatës botërore të gazetarëve “Reporterët pa Kufij”, për regresin e Shqipërisë në raport me lirinë e medias. Zbritja me 7 vende në Indeksin Botëror të Lirisë së Medias dhe paralajmërimi serioz i këtij raporti se “rruga e Shqipërisë për në Bashkimin Europian është e gjatë”, është një kambanë e fortë alarmi që duhet të na zgjojë të gjithëve. Angazhimi i institucioneve dhe i shoqërisë në përkrahje të lirisë së të shprehurit është tregues për demokracinë, qeverisjen e mirë dhe përgjegjësinë publike në vend”, shprehet Meta.

Më tej ai thekson se nuk duhet të harrojmë se liria e të shprehurit është e drejtë themelore e njeriut dhe shtyllë e pazëvendësueshme e jetike për një shoqërie moderne demokratike.

“Neni 49 i Traktatit të Lisbonës e përcakton qartë garantimin e lirisë së shprehjes dhe një vend i cili synon t’i bashkohet BE-së duhet të respektojë garantimin e saj. Liria e medias është jetike për garantimin e llogaridhënies nga të gjitha institucionet publike. Në mënyrë të përsëritur kam dënuar me ashpërsi të gjitha sulmet dhe çdo akt dhune ndaj gazetarëve, që fatkeqësisht janë shpeshtuar kohët e fundit”, shton Meta.

Ai apelon sërish me forcë që autorët e krimeve ndaj përfaqësuesve të medias të vihen menjëherë para drejtësisë dhe t’i jepet fund shantazhit, intimidimit apo çdo lloj tjetër presioni ndaj tyre.

“Shpreh solidaritet të plotë me gazetarët e cenuar në misionin e tyre në shërbim të lirisë, të qytetarëve dhe në interes të konsolidimit të të gjithë sistemit tonë demokratik.🇦🇱 Kreu i Shtetit e cilëson një kambanë alarmi që duhet t’i zgjojë të gjithë dhe dënon dhunën ndaj gazetarëve. Ai kërkon që përgjegjësit të vihen para drejtësisë e t’i jepet fund çdo shantazhi apo presioni ndaj mediave”, përfundon Meta./b.l/noa.al/

Loading...
Loading...