Sarandë, AKU asgjëson 7636 kg me ushqime të skaduara
Transmetuar më 02-08-2019, 21:21

Autoriteti Kombëtar i Ushqimit në bashkëpunim me Inspektoriatin e Mjedisit Sarandë, kanë asgjësuar pas ribllokimit sasinë prej 7636 kilogramë me ushqime të skaduara.

Autoriteti Kombëtar i Ushqimit duke siguruar koordinimin dhe bashkëveprimin me Inspektoriatin e Mjedisit, Bashkia Sarandë, për të mundësuar asgjësimin e produkteve të skaduara që u ribllokuan një ditë më parë nga AKU, ditën e sotme në Vollodër, zonë e vënë në dispozicion nga Bashkia Sarandë për asgjësimin e mallrave me origjinë shtazore.

AKU thotë se shëndeti dhe interesi i konsumatorëve nuk mund të cenohen nga papërgjegjshmëria e operatorëve të biznesit apo strukturave të tjera, ndaj AKU mori të gjitha masat e nevojshme që produktet e skaduara prej vitesh të asgjësoheshin, duke mos kërcënuar më asnjë konsumator, jo vetëm të Sarandës, por edhe më gjerë në vend.

Tashmë, falë bashkëpunimit të frytshëm të Autoritetit Kombëtar të Ushqimit me institucionet e tjera ligjzbatuese, u bë i mundur asgjësimi i produkteve të ribllokuara ditën e djeshme në subjektin “Arben Mehmeti”, duke pastruar kështu tregun nga produkte të cilat përbënin rrezik serioz për Sigurinë Ushqimore.

Autoriteti Kombëtar i Ushqimit do të vijojë punën rigoroze për të garantuar Sigurinë Ushqimore në vend, duke mbajtur pastër tregun e brendshëm nga produkte të pasigurta për konsum, si dhe duke siguruar të gjithë konsumatorët për produktet që konsumojnë. /a.y/noa.al

Loading...
Loading...