Aktorja e njohur, Marjana Kondi ka reaguar pas statusit të Kryeministrit Rama që e citonte atë se ishte për ndërtimin e një Teatri të ri.

Që në fillim, Kondi sjell në vëmendje largimin e saj nga puna në vitin 2014, për arsye që sipas saj ende nuk i di.

Por ajo e lidh largimin nga puna pasi shprehu domosdoshmërinë e kushteve më të mira në teatër.

Postimi i plotë:

Unë vlej!

Jam aktorja dhe punonjësja e parë e cila në vitin 2014 reformoi Teatrin Kombëtar duke më larguar nga puna ( arsyet e së cilës i di vetëm drejtuesi i institucionit)

Jam aktorja që Shteti Shqiptar dëmshpërbleu me XX000000 lekë për largimin tim të padrejtë nga puna.

Jam aktorja që sot Kryeministri i Shqipërisë më dedikon një status në faqen e tij.

Jam aktorja që konsiderohem nga një Kryeministër Artist si një ndër artistet që ka mbledhur më shumë duartrokitje në skenën e Teatrit Kombëtar.

Shoh që jam cituar por jo plotësisht, zakon i vjetër i politikës që në rastin më të mirë e thotë të vërtetën përgjysmë dhe kjo e bën atë të gënjeshtërt.

Kryeministri apo çdo palë politike duhet t’i citojë dhe referojë artistët në gjithë të vërtetën e tyre dhe e verteta ime është që pasi kam kërkuar kushte, më kanë larguar nga puna në teatrin kombëtar, pikërisht unë që Kryeministri thotë që jam duartrokitur shumë.

Jam distancuar nga debati për teatrin dhe do të përfshihem kur të shoh që mendimi i artistit vërtetë vlen për teatrin dhe jo për përdorim politik.

Unë vlej !

Vlej sa gjithë duartrokitjet e publikut tim.