Meta nga mali i Tomorrit: Të na japë forcë Abaz Aliu, në rrugën për një Shqipëri më të drejtë
Transmetuar më 22-08-2019, 12:00

Presidenti Ilir Meta mori pjesë ditën e sotme në ceremoninë e përvitshme të pelegrinazhit në malin e Tomorrit.

Teksa në ceremoni ndodhej edhe ministri i Turizmit, Blendi Klosi, ai tha se ka shumë mysafirë të nderuar që nuk kanë qenë këtu një vit më parë dhe kjo është shenjë e mirë.

Sipas tij, kjo do të thotë që punët për vitin që vjen do të shkojnë më mirë në vendin tonë dhe hapësirat tona dhe me ndihmën e Abaz Aliut.

“Të na japë të gjithëve forcë Abaz Aliu në rrugën tonë për një Shqipëri më të drejtë, më të bashkuar dhe europiane.

Na ndihmoftë Abaz Aliu të gjithëve. Rroftë Shqipëria”, u shpreh Meta.

Fjala e plotë e kreut të shtetit:

Është kënaqësi të shoh sot më shumë besimtarë dhe mysafirë të nderuar, të cilët janë bashkuar me ne në këtë Festë të Shenjtë, këtu në malin e Tomorrit.

Kjo është shenjë e mirë që punët në vitin që vjen do të shkojnë më mirë për vendin tonë dhe në të gjitha hapësirat tona, me ndihmën e Abaz Aliut.

Ndaj edhe ne mblidhemi çdo vit këtu në malin e Tomorrit për të nderuar jo vetëm këtë figurë të shenjtë, por për të nderuar të gjithë ato legjenda, personalitete dhe baballarë, të cilët përmes bektashizmit bënë dhe bëjnë më të mirën për Shqipërinë dhe për çështjen tonë kombëtare.

Për të nderuar gjithashtu të gjithë ata të cilët bënë gjithçka për gjuhën shqipe, për të nxitur lëvizjet për çlirim dhe bashkim kombëtar, të cilët punuan gjithmonë pa u lodhur për të forcuar harmoninë ndërfetare në vendin tonë.

Poeti ynë i madh kombëtar, Naim Frashëri, në momentet më të vështira dhe më të dëshpëruara të mbarë kombit për t’i dhënë fuqi shqiptarëve, për t’i zgjuar dhe për të pasur më shumë vetëbesim iu referua dhe i dha vendin të cilin meritonte edhe në poezi figurës madhështore të Abaz Aliut:

‘Abaz Aliu zu’ Tomorr,

Erdhi afër nesh,

Shqipëria s’mbet e gjorë,

Se Zoti e desh’.

Ndaj duke falënderuar Kryegjyshin Botëror për këtë organizim madhështor, dua t’ju uroj të gjithëve ju që keni ngjitur sot malin e Tomorrit, të gjithë besimtarëve bektashi dhe të gjithë shqiptarëve kudo ndodhen, suksese dhe mbarësi në familjet tuaja!

Abaz Aliu të na japi forcë të gjithëve në rrugën tonë për një Shqipëri më të drejtë, për një Shqipëri më të bashkuar, për një Shqipëri të vërtetë europiane, siç e meritojnë të gjithë shqiptarët e sidomos të rinjtë e të rejat, por edhe të gjithë këta fëmijë të mrekullueshëm të cilët kanë mbushur sot malin e Tomorrit.

Na ndihmoftë Abaz Aliu të gjithëve!

Rroftë Shqipëria!”

Loading...
Loading...