Në ditën e përkujtimit të viktimave nga regjimet totalitare, kryetari i Partisë Demokratike ka dalë me një mesazh ku njofton dhe planin me 3 pika pas rikthimit në pushtet.

"Në këtë ditë kujtese, rikonfirmoj në emër të Partisë Demokratike, së bashku me ndjesën që nuk kemi arritur të bëjmë gjithçka nevojitet për nderimin e sakrifices së të përndjekurve politikë, për gjetjen dhe nderimin e eshtrave të të ekzekutuar pa gjyq, vendosmërinë tonë që në Parlamentin e dalë nga vota e lirë do të miratojmë ndër aktet e para:

– ndalimin dhe kriminalizimin e simboleve të komunizmit, dhe nderimin për xhelatët e diktaturës, që kanë për qëllim të fshijnë çdo kujtesë të sakrificës dhe rezistencës për liri.

– nderimin e viktimave të komunizmit, për të sprapsur revanshin komunist, i cili u rilind dhe u materializua, me vendimin kriminal për të hequr dhe kufizuar dëmshpërblimin për pasardhësit e të ekzekutuarve.

– angazhimin ligjor dhe financiar për gjetjen dhe nderimin e të ekzekutuarve pa gjyq që sot janë pa varr dhe heshtrat e të cilëve nuk gjenden".

Basha shprehet i bindur se drejtësia nuk mund të vijë nga persekutorët e rilindur.

Sipas tij Shqipëria është vendosur nën një tjetër diktaturë të krimit.

"Për pushtetin dhe pasurimin e tij të paligjshëm Edi Rama ka kthyer policinë politike, prokurorinë dhe drejtësinë private dhe burgosjet dhe gjygjet politike. Ndërkohë kriminelët dhe pushtetarët hajdutë janë mbi ligjin gëzojnë pandëshkueshmëri dhe mbrojtje nga Edi Rama.

Kjo e keqe do të ndalet me çdo kusht e me çdo çmim dhe shqiptarët e bashkuar do ta fitojnë betejën për vlerat themelore të demokracisë, votën e lirë, dhe nderimin e trajtimin dinjitoz të të përndjekurve politikë dhe të gjithë shqiptarëve të ndershëm", thotë Lulzim Basha.

Ai pohon se “askush nuk ka paguar një çmim më të lartë për lirinë në Europë, se sa shqiptarët”.

Lideri demokrat nënvizon se sakrifica e shqiptarëve përkthehet në mijëra të ekzekutuar me dhe pa gjyq, për liri, për demokraci, për dëshirën për të ndërtuar një shoqëri të respektit për dinjitetin njerëzor, sipas normave dhe vlerave europiane, për fjalën e lirë, për besimin në Zot.

Më tej Basha bën edhe një bilanc të asaj se çfarë ka ndodhur në atë kohë me shqiptarët.

34 mijë e 135 shqiptarë janë burgosur dhe dënuar për arsye politike.

59 mijë e 9 qytetarë u internuan në kampe përqendrimi.

7 mijë e 22 prej tyre vdiqën prej trajtimit shatazarak.

984 persona kanë vdekur në burgjet e regjimit.

6 mijë e 27 burra dhe gra, djem dhe vajza u ekzekutuan me dhe pa gjyq gjatë diktaturës.

Nga torturat dhe dënimet e kohës, 308 persona kanë humbur aftësitë mendore gjatë qëndrimit në burgjet e komunizmit.

Basha flet për krimin më të rëndë që përjetuan shqiptarët nga komunizmi, por më e rëndë “është zhdukja e gjurmëve të krimit”.

Këtu Basha i referohet mosgjetjes së eshtrave të 4 mijë e 500 të vrarëve me edhe pa gjyq. /k.k/noa.al/