“Me 3 identitete, i dënuar në Itali dhe Maqedoni”, PD kërkon verifikim e kryebashkiakut të Vaut të Dejës
Transmetuar më 10-09-2019, 11:12

Partia Demokratike i kërkon Prokurorisë së Përgjithshme verifikimin e Mark Babanit, kryebashkiakut të zgjedhur të Bashkisë së Vaut të Dejës, duke denoncuar tre identitete të tij, si dhe dënime dhe dëbime në Itali dhe Maqedoni.

Sekretari i Përgjithshëm i PD, Gazment Bardhi i vuri në dispozicion Prokurorisë të gjithë informacionin që disponon Partia Demokratike për kryebashkiakun e tretë të Edi Ramës sipas kësaj force politike, i cili rezulton me të kaluar kriminale.

“Ai dyshohet se ka qenë i arrestuar/ndaluar në Itali gjatë periudhës 1994 -1999 dhe, më pas, ndaj tij është marrë masa e dënimit dhe dëbimit nga autoritetet përgjegjëse italiane. Nga ana tjetër, të dhëna të bëra publike më parë tregojnë se ai ka qenë i arrestuar/ndaluar dhe më pas dënuar edhe në Republikën e Maqedonisë së Veriut gjatë periudhës 2002-2003”, thuhet në shkresën e Partisë Demokratike, ku zbulohet edhe një detaj tjetër, që ngre dyshime se Mark Babani i Bashkisë së Vaut të Dejës ka gënjyer në formularin e dekriminalizmit.

“Në formularin e Vetëdeklarimit shtetasi Mark Babani ka deklaruar se ka jetuar për 5 vite në Itali. Nga verifikimi i të dhënave të sistemit TIMS rezulton se shtetasi Mark Babani nga periudha 1994- 2005 nuk ka udhëtuar në asnjë rast të vetëm në drejtim të Italisë me identitetin e tij real, çka përbën një indicie për saktësinë e të dhënave të bëra publike më parë”, thuhet më tej.

Partia Demokratike vë në dijeni Prokurorinë edhe për të paktën tre identitete të tjera që Mark Babani, “i emëruar nga Edi Rama në Bashkinë e Vaut të Dejës”, nuk i ka deklaruar në formular.

“Në Formularin e Vetëdeklarimit shtetasi Mark Babani ka deklaruar se ka mbajtur identitetin e ndryshuar Mark Ndoc Babaj, i datëlindjes 24.12.1966. Ekzistojnë dyshime të arsyeshme sipas indicieve të bëra publike më parë, se ky shtetas, gjithashtu në mënyrë ilegale ka mbajtur edhe disa identitete të tjera, të padeklaruara në Formularin e Dekriminalizimit, si më poshtë: Mark Ndoc Babani, i datëlindjes 24.12.1965; Marq Saimir Babaj, i datëlindjes 11.06.1967; Ylli Saimir Babaj, i datëlindjes 02.11.1968”, deklaron PD.

Në kërkesën për verifikimin e Mark Babanit nga Prokuroria, e shoqëruar me firmat e 500 qytetarëve, Partia Demokratike vë në dukje se pret një verifikim dhe reagim të shpejtë nga Prokuroria, për shkak të interesit të lartë që çështja paraqet. /a.y/noa.al

Loading...
Loading...