Gratë ministre të qeverisë “Rama” letër Holandës zyrtare, “forca të errëta kundër Shqipërisë”
Transmetuar më 08-10-2019, 15:58

Holanda konsiderohet vendi më skeptik, sa i përket çeljes së negociatave me Shqipërinë.

Qeveria holandeze zyrtarizoi qëndrimin e saj për sa i takon çeljes së negociatave për Shqipërinë.

Holanda zyrtare e sheh të parakohshëm vendimin për Shqipërinë.

Ndërkohë Tirana zyrtare i drejton një letër qeverisë holandeze, kur mbeten edhe pak ditë nga vendimi.

Letra mban firmën e grave ministre të qeverisë shqiptare, të cilat theksojnë me krenari faktin që vetëm përpara pak ditësh, OKB-ja e njohu Shqipërinë si njërën prej pesë vendeve të globit me kabinetin më të balancuar gjinor.

“Tetë nga 15 ministritë në Qeverinë shqiptare drejtohen nga gratë; si nëna dhe vajza, si gra që luftojnë për familjet tona dhe për vendin tonë, ne do të donim të shtronim me ju një çështje që na shqetëson shumë të gjithëve, e cila ka rëndësi të jashtëzakonshme për të gjithë shqiptarët- perspektiva evropiane e vendit tonë”, thuhet në letër.

Ministret socialiste, sipas TCH, shtojnë faktin se në Shqipëri ka një admirim për Holandën, si një komb me tradita të mëdha dhe një rekord të guximit politik e tolerancës shoqërore.

Por Shqipëria, theksohet aty, ka një histori shumë të ndryshme. “Në rrugën e demokracisë ne hymë vetëm 30 vjet më parë, pas 5 dekadash të gjata e të errëta, si një lloj Koreje europiane e Veriut”.

Qeverisë holandeze i kujtohet se pavarësisht vështirësive, gjatë këtyre tre dekadave ka pasur përparime të jashtëzakonshme; vendi po ndryshon për mirë çdo ditë, por nuk mungon gjithashtu ndërgjegjësimi se kemi ende një rrugë të gjatë përpara.

Letra e tërheq vëmendjen edhe tek bashkëpunimi mes Shqipërisë dhe Holandës në luftën kundër krimit të organizuar, që sidomos vitin e kaluar ka qenë më i thellë se kurrë më parë.

“Shpresojmë ta kuptoni se sa e vështirë është beteja jonë, të cilën nuk mund ta fitojmë të vetëm”, thuhet më tej, “dhe disa nuk duan që ne ta fitojmë, përfshirë dhe një pjesë këtu në vendin tonë”.

“Dështimi i përpjekjeve tona për të çelur bisedimet e anëtarësimit është çmimi më i madh për këto forca të errëta. Ne nuk kërkojmë që të ndryshoni pikëpamjet tuaja, thjesht duam që të bashkoheni me kombet e tjera të Europës duke i shtrirë dorën Shqipërisë dhe të na lejoni t’i çojmë këto përpjekje tonat në të një tjetër nivel”, përfundon letra.

Parlamenti i Holandës do të diskutojë dhe do të vendosë fatin e mëtejshëm të integrimit për Shqipërinë dhe Maqedoninë e Veriut, ashtu siç veproi Gjermani. Një tjetër vend skeptik konsiderohet Franca. /NOA.al/

Loading...
Loading...