Gjykata e Krimeve të Rënda ka caktuar ditën e sotme masën e sigurisë “arrest me burg” për Redjan Rrajën, 34-vjeçarin e arrestuar si të dyshuar për atentatin e 1 nëntorit, pranë zonës së Sukthit, ku mbeti i plagosur prokurori i Durrësit, Arjan Ndoji dhe dy të tjerë.
Rraja u arrestua si i dyshuari kryesor për ngjarjen, pasditen e së hënës duke tentuar të largohej drejt Malit të Zi.
Gjatë marrjes në pyetje nga policia, 34-vjeçari ka mohuar që të ketë gisht në ngjarje dhe ka deklaruar se gjithçka e ka mësuar nga media.
“Nuk i njoh personat e përfshirë në ngjarje. Në momentin kur ka ndodhur ngjarja kam qenë duke udhëtuar në itinerarin që bëj gjithmonë në Tiranë-Durrës-Fushë Krujë”, është shprehur Rraja.
Gjatë ditës së sotme ai do të njihet me masën e sigurisë në Gjykatën e Krimeve të Rënda, teksa Prokuroria ka kërkuar “arrest me burg”.
Kjo pasi ndaj tij rëndojnë akuzat e “Vrasjes së funksionarit publik”, “Vrasje e mbetur në tentativë dhe “Armëmbajtje pa leje”.
Shkak për rënien në gjurmët e 34-vjeçarit u bënë një palë syze të gjetura në makinën tip ‘Benz’ me targa AA 234 LM, të cilën atentatorët e braktisën pas ngjarjeve.
Pikërisht shenjat e gishtave të gjetura në syze e “morën më qafë” Rrajën, pasi përkonin me të tijat.
Në atentatin e së premtes krahas prokurorit Ndoji mbeti i plagosur edhe Landi Muharremit dhe shoferit të prokurorit, Andi Maloku. /a.y/noa.al