Kompozitori Edmond Zhulali tha sot se me vargjet që aktori Çun Lajçi, të cilat i shkroi posaçërisht në ditët më dramatike teksa Shqipëria u gjunjëzua, pas tërmetit shkatërrimtar, do të krijohet një këngë.
Disa nga artistët më të njohur në vend, nisur nga ngjarja tragjike që preku çdo shqiptar anembanë, kanë menduar që t’i kushtojnë asaj një këngë, ndërsa janë zgjedhur vargjet e saj. Mbetet ende enigmë se kush do ta këndojë këtë këngë, dhe cilët artistë të tjerë do të angazhohen.
Gjithsesi, besohet se do të jetë një grup këngëtarësh nga Shqipëria dhe Kosova, të cilët do t’i këndojnë momentit dramatik, me lajtmotiv shprese dhe ringritjeje, ashtu siç edhe kombi ynë është bashkuar e ka rezistuar në çdo moment të vështirë dhe delikat që ka kaluar në histori.
Vargjet e Çun Lajçit, dedikuar Shqipërisë, prekën dhe solidarizuan edhe më tepër shqiptarët, ndërsa ato vargje së shpejti pritet të ndërthuren edhe me melodi.
T’ kemi nanë moj Shqipni
Rrehin zemrat n’tela t’sharkisë
gjëmon kanga
moj Shqipni mos thuej mbarova
por s’asht Isa janë djemtë e ri
që edhe dekën ta përpijnë moj zojë e randë
moj zojë e mirë
se je nanë
edhe rrajtë t’i lidhin n’gurë
s’t’lanë m’u dridhë
djepa prap ke me përkundë
Njefsha t’mirën për ty Shqipni
që kurrë s’m’u lige
edhe kangën kurrë s’ma këpute
bane deka e kurrë nuk qave
s’t’piku loti përmbi gurë
çoje kryet ta puthi ballin zojë e randë
t’i marr dhimtë
e t’i vari n’sqep t’skyfterit
atje naltë n’t’kuqin flamur
Lugut t’Fanit po zbret Kosova
rreptë si Isa do djem t’ri
me t’dhanë shpirt nër gërmadha
me t’dhanë zemra
se t’kemi nanë mori Shqipni