Prag festash, biskotat topa bore i përshtaten më shumë kësaj periudhe
Transmetuar më 12-12-2019, 12:15

A mund të ketë biskota që i shkojnë festës së fundvitit e dimrit më shumë se topat e borës me bajame? Përgatiten fare thjesht dhe shkriiiiiiijnë në gojë…

Koha e përgatitjes: 35 minuta, 1 orë në frigorifer

Koha e pjekjes – 15 minuta

Përbërësit për afërsishte 40 biskota: 300 g miell, 1 majë thike kripë, 225 g gjalpë i butë si krem, 70 g sheqer pluhur, 4 lugë qumësht, 100 g çokollatë e zezë, e grirë në thërrime 60 g bajame të pjekura, të grira imët ose lajthi të pjekura, sheqer pluhur për t’i lyer sipër.

Përgatitja:

1.Me rrahësen elektrike rrahim gjalpin me kripën dhe sheqerin derisa të bëhen si masë kremoze. Shtojmë pjesë-pjesë miellin, bajamet dhe çokollatën dhe së fundi qumështin. I përziejmë me dorë derisa të përftojmë një brumë homogjen.

2.I japim formën e një sallami, e mbulojmë me plastmasë kuzhine dhe e lëmë të pushojë në frigorifer për 1 orë.

3.Ndezim furrën në temperaturën 180° C.

4.Kur furra të ketë arritur temperaturën e duhur, e presim brumin me thikë në feta 1 cm të trasha, i japim formë të rrumbullakët si një kokërr arre, i vendosim në tavën ku kemi shtruar letër furre dhe i pjekim për 15 minuta.

Në momentin që marrin shumë pak ngjyrë në sipërfaqe, janë gati. Sapo i nxjerrim nga furra, i lyejmë me sheqer pluhur, i lëmë të ftohen plotësisht mbi një grilë dhe i lyejmë përsëri me sheqer pluhur. I ruajmë 2-3 ditë në një kuti me kapak./b.l/noa.al/

Loading...
Loading...