Ministri i Brendshëm Sandër Lleshaj e ka cilësuar “të panevojshme” deklaratën e kryebashkiakes së Shkodrës Voltana Ademi, për të cilën thotë se duhet të justifikojë rrogën që merr.

Në një reagim publik, Lleshaj thotë se Ademi duhet të dalë të heqë lakrat e plehrat që kanë zënë trotuaret. Ndërkohë thekson se situata në Shkodër është alarmante dhe qytetarët janë të ekspozuar frikshëm ndaj koronavirusit.

Ministri Lleshaj i bëri thirrje kryebashkiakes Ademi që të bashkëpunojë dhe të tregojë se çfarë mund të bëjë qeveria për ta ndihmuar më shumë në këtë situatë të vështirë.

Deklarata e plotë e Sandër Lleshaj

Kryebashkiakja e Shkodrës e lexoi jo pa vështirësi një deklaratë të panevojshme, për të shitur si politike, paaftësinë e saj për të bërë disa detyra bazike në shërbim të qytetarëve të saj. Shkodra sot nuk ka nevojë për politikë, por për pastërti dhe qytetari nga të gjithë.

Pazaret skandaloze, që ngjajnë me ato të Kandaharit, nuk i bëjnë as nder dhe as dobi kryeqendrës sonë të Veriut. Eleminimi i tyre kërkon vetëm pak vullnet, por në radhë të parë sy për të parë.

Edhe pse pa mandat, kryetarja e harruar në zyrë duhet të justifikojë të paktën pagën që megjithatë merr.

Situata në Shkodër është ulëritëse dhe qytetarët shkodranë janë frikshëm të ekspozuar ndaj rrezikut të epidemisë.

Zonja Ademi të dalë dhe të heqë lakrat, barishtet e plehrat gjithfarë që kanë zënë rrugët e trotuaret.

COVID-19 është sfida e përbashkët dhe rrugët e këtij armiku të padukshëm duhet të bllokohen edhe në Shkodër, ku dorëzimi i papranueshëm i pushtetit vendor duket alarmant! Ne duam bashkëpunim dhe bashkëveprim.

Ju lutem zonja Ademi mos humbni kohë me llafazanërira politike, por bëni punën tuaj dhe na thoni si mund t’ju ndihmojmë më shumë!/a.m/noa.al

Situata në Shkodër, Ademi: Thirrja ndaj qeverisë për bashkëpunim, në vesh të shurdhër