Bukën e përditshme falna zoti Rama!

Nga Ylli Dylgjeri

Deri më tash kam ndjekur me vëmëndje Paketën tuaj që ende nuk e keni ndarë mëndjen është sociale, ekonomike, apo social-ekonomike. Them Paketa jote dhe jo e imja, sepse deri më tani paketa është ofruar, ose është studiuar që shumica të mos marrë dhe veçanërisht të përjashtohen shtetasit jo Rilindas. Them shteti yt dhe jo i imi se deri më tash unë se gjej veten në asnjë kategori apo shtresë të përkrahjes sociale.

Për të kuptuar lexuesi po i rikujtoj se sot jam i pa punë prej 13-të muajsh nga një largim arbitrar që Gjykata Administrative e rrëzoi si të pa mbështetur në asnjë ligj. Gjykata e rrëzoi dhe më dha të drejtë. Unë fitova gjygjësisht ndaj padrejtësisë së Ministrisë së Financave dhe Qeverisë. Pra, kam fituar gjygjet ndaj vendimeve arbitrare por nuk fitoj socialisht nga paketa financiare e po të njëjtës Ministri Financash dhe po të njëjtës Qeveri! Në këto kushte, kryefamiljar, i papunë, i izoluar në shtëpi duhet të pres se çfarë mbështetje mund të marr nga Shteti yt (i imi) pa afat e pa asnjë shans.

Këtu me lind e drejta t’ju pyes edhe si Kryetar Shteti dhe siç thoni së fundi edhe si Baba: Ku futem unë dhe kategoria ime që kanë fituar gjyqet nga akuzat arbitrare? Ku do të ha unë? Nëse nuk ka zgjidhje nga ju, më lër të lirë të luftoj me Coronën. Ose të më hajë Corona ose ta ha unë Coronën! Kështu siç jam, nuk mund të ushqehem as me cironka!