Gazeta më e shitur në Europë, BILD, në një analizë faktesh dhe deklaratash që publikoi, thekson se në përballje me virusin dhe pandeminë COVID-19, “lockdown” / izolimi, ishte një gabim i pamatshëm, një gabim shumë i madh. Vlerësimi vjen pas një sondazhi të kryer me shumë figura publike, intelektualë, kritikë dhe opinionistë, politologë dhe ekonomistë.

Dhe duke riprodhuar komente nga shtatë intelektualë të mirënjohur, nga grupi i të pyeturve, gazeta Bild nënvizon se dyshimet, argumentet dhe përplasjet e këtyre muajve të izolimit, lidhur me kufizimin e të drejtave të njeriut, rezultojnë të vërteta. Gjatë izolimit njerëzve u janë cënuar të drejta themeltare.

Në prezantimin e opinioneve të këtyre mendimtarëve të paanshëm me vlera të mëdha intelektuale, gazeta gjermane vë në dukje se udhëheqësit politikë të Gjermanisë, injektuan dhe imponuan në popull rekomandime zgjuarsisht të kamufluara, për të justifikuar izolimin, rekomandime që rrodhën zinxhir dhe po i ndiqnin verbërisht shumë vende në Europë. Ato ishin rekomandime që justifikonin thjesht me fjalë izolimin e ekonomisë dhe të jetës publike, ndërkohë që interferonin dhe cënonin lirinë e çdokujt, pa marrë parasysh fare “zërat kundër” këtyre masave, apo rekomandimeve të ndërmarra. Për më tepër, në shtete si Shqipëria, masat izoluese nuk ishin rekomanduese por urdhëruese, madje të shoqëruara me një "lumë" aktesh normative me ndëshkime të rënda.

Prof. Klaus Püschel, për shembull, një patolog, kreu i Institutit të Mjekësisë Ligjore në Spitalin Universitar të Hamburgut, e argumentoi me prova se “në fund, COVID-19 është një sëmundje virale si gripi, që në shumë raste është e parrezikshme dhe është fatale vetëm për raste përjashtimore”.

“Është e rëndësishme të shikosh post-aritmetikën e epidemisë, për të parë nëse Covid-19 shkaktoi vdekje në nivelin e një pandemie”, vuri në dukje doktor Püschel. “Covid-19 rezultoi të ishte kashta që i theu shpinën devesë”.

Profesori Stefan Homburg i Universitetit të Hanover, një ish këshilltar i qeverisë federale, pranon se shifrat zyrtare nuk e justifikojnë kurrësesi izolimin / ‘lockdown’.

Qeveritë e të gjitha shteteve, përfshirë edhe Gjermaninë që duket se drejtonte të tjerët, bënë një gabim të pamatshëm, një gabim gjigant me mbylljen, izolimin e vendit, Europës dhe botës.

Frika është që pasojat mund të jenë të mëdha dhe shpresa le të mbetet që qeveritë nuk do të ndërmarrin ndonjë valë të dytë masash dhe rekomandimesh, por do të hapin urgjenisht dhe tërësisht vendet e tyre.