Transmetuar më 03-07-2020, 22:07

Epidemiologia e Institutit të Shëndetit Publik (ISHP), Marjeta Dervishi, tha sot, se një bebe është rasti i parë i shtrimeve për shkak të COVID-19 në Shqipëri. Ajo tha se foshnja 2 muajsh dhe nëna e saj janë shtruar me shenja klinike të COVID-19 kryesisht temperaturë, dhe janë në monitorim të plotë nga pediatri në gjendje të stabilizuar.

Teksa theksoi se rasti i foshnjës 2-muashe me COVID-19 është i pari në Shqipëri kur një fëmijë paraqitet me shenja klinike dhe shtrihet në spital, pasi siç shpjegoi në përgjithësi rastet e fëmijëve tek ne kanë shkuar mirë.

Znj. Dervishi tha se që nga nisja e pandemisë në vendin tonë janë infektuar me COVID-19, 125 fëmijë.

Epidemiologia e lidhi numrin e shtuar të rasteve me COVID-19 në vendin tonë gjatë javëve të fundit me lehtësimin e masave pas karantinës, e shoqëruar kjo edhe me një mungesë të theksuar bashkëpunimi nga qytetarët në zbatimin e masave mbrojtëse.

“Duhet të ketë një rritje të ndërgjegjësimit për të respektuar masat që janë fare të thjeshta. Është i detyrueshëm përdorimi i maskave në ambiente të mbyllura, virusi është mes nesh.

Pas periudhës së karantinës ka ndodhur e kundërta, nuk kemi pasur respektim të masave mbrojtëse”, tha znj. Dervishi.

Foto të fëmijës i publikoi ministrja e Shëndetësisë Ogerta Manastirliu