Rastet e shtuara me COVID-19 në vendin tonë, Silva Bino: Të mbyllen fundjavat
Transmetuar më 10-07-2020, 22:16

Silva Bino, shefja e Departamentit të Sëmundjeve Infektive në ISHP, Silva Bino,tha sot se për shkak të numrit të lartë të rasteve të reja me koronavirus, në vendin tonë, duhet marrë në konsideratë seriozisht mbyllja në fundjava.

“Unë e mendoj mbylljen në fundjavë. Është një masë që duhet marrë parasysh. Le të sakrifikojmë një ose dy fundjava për të mos pasur më shumë të sëmurë”, tha ajo në një intervistë për TvT.

Bino shtoi se një sakrificë e tillë mund të bëhet për hir të uljes së numrit të të infektuarve.

Ajo nuk u shfaq optimiste lidhur me reduktimin e rasteve të reja në javët e ardhshme.

“Parashikimet nuk janë të mira për 2-3 muaj. Edhe për dy javë të tjera parashikohet të kemi raste të rritura. Ne duhet të luftojmë ta hedhim poshtë këtë që themi. Është tepër e rëndësishme”, tha Bino.

Sipas saj, masat më të mira parandaluese mbeten distancimi fizik dhe gjurmimi i kontakteve të të prekurve.

“Janë ritme që kërkojnë masa. Të vetmet janë distancimi fizik dhe izolimi. Jemi në një realitet të ri. Realiteti i ri është ky: lokalet janë hapur por distancat duhet të ruhen. Kudo që shkojmë duhet të mbajmë maskë".

"Në mjediset e mbyllura qarkullon virusi. Bëhen 800-900 teste në 24 orë. Është e rëndësishme rritja e numrit të tyre. Më e rëndësishmja është izolimi i të infektuarve dhe karantina e kontakteve të tij”, theksoi më tej Silva Binoo.

Shefja e Departamentit të Sëmundjeve Infektive në ISHP apeloi sërish qytetarët që të mos neglizhojnë sëmundjen, pasi ecuria e saj ndryshon nga një pacient në tjetrin.

“Kam një apel: Covid është sëmundje djallëzore dhe tinzare. Sot isha vetë në Infektiv. Të mos i injorojmë ata njerëz që po e vuajnë këtë sëmundje. Është sëmundje tepër djallëzore që të merr jetën pa e kuptuar. Është një mesazh që më mirë të mbrohemi sesa t’u besojmë teorive konspirative pa baza”, tha ajo, lidhur me situatën më të fundit të Covid-19, në vendin tonë.

/NOA.al

Loading...