Transmetuar më 12-09-2020, 22:42

Në Francë, autoritetet shëndetësore raportuan të shtunën 10 561 raste të reja me koronavirus në 24 orët e fundit.

Ky është një rekord i ri negativ, me Francën që arrin shifrën e 10 000 rasteve të reja në ditë për herë të parë që nga shpërthimi i pandemisë.

Ditën e djeshme, Franca kishte regjistruar 9 843 raste të reja, shifër që përbënte rekord më vete.

Pas bilancit të ditëve të fundit, Franca po planifikon të ashpërsojë reagimin ndaj pandemisë së Covid-19.

Kreu i Këshillit Shkencor që këshillon qeverinë mbi pandeminë, Jean-Francois Delfraissy, paralajmëroi se vendime të vështira mund të merren gjatë javëve në vazhdim.

Situata është ndërlikuar edhe më shumë nga rihapja e shkollave. Autoritetet shëndetësore kanë mbyllur 32 institucione deri më tani, ndërsa 524 klasa janë dërguar në shtëpi për të zhvilluar mësim në distancë.

Gjatë ditëve të fundit është regjistruar një valë e gripit të zakonshëm, siç ndodh çdo vit me nisjen e shkollës. Por tani, mjafton një teshtimë për të çuar nxënësit në shtëpi.

Mjekët e familjes po mbyten me telefonata, ndërsa laboratorët apo tendat e ngritura për kryerjen e tamponëve nëpër rrugë po dynden me njerëz.