Transmetuar më 11-10-2020, 15:04

Greqia kërkon që çështja e kufirit detar me Shqipërinë të marrë zgjidhje sa më parë.

Në një intervistë për mediat vendase, ministri i Jashtëm grek, Nikos Dendias ka thënë se ky  proces i shërben edhe integrimit të Shqipërisë.

“Është zgjedhje e Greqisë përcaktimi i shefit kontinental dhe ZEE të bazohet në të drejtën ndërkombëtare, me të gjitha vendet fqinj. Kështu dëshirojmë edhe me Shqipërinë të zgjidhim këtë çështje të prapambetur sa më shpejt të jetë e mundur.

Siç deklarova pak kohë më parë në Parlament, në debatin për ratifikimin e marrëveshjeve të demarkacionit detar me Italinë dhe Egjiptin, shpresoj që hapi tjetër të jetë nënshkrimi i një marrëveshje me Shqipërinë.

Më lejoni t’ju kujtoj se ne kishim nënshkruar një marrëveshje në 2009-ën, por që nuk pati zhvillim për arsyet e njohura.

Shpresoj që së shpejti të mundemi të rikapim sërish fillin e bisedimeve përkatëse dhe të arrijmë në rezultate të kënaqshme për të dy palët.

Është e rëndësishme, në kontekstin e marrëdhënieve të fqinjësisë së mirë dhe duke marrë parasysh perspektivën evropiane të vendit tonë fqinj, të mbyllen të gjitha çështjet e hapura, pasi kjo automatikisht do të drejtojë në një azhurnim të marrëdhënieve tona dypalëshe dhe do të jetë në të mirën e të gjithëve”, ka thënë ministri grek. /k.k/noa.al/