Eugena Tomini: Dy faktorët që kanë ndikuar në rritjen e rasteve me Covid në Shqipëri
Transmetuar më 19-10-2020, 09:37

Eugena Tomini, shefja e Epidemiologjisë dhe Survejancës në Institutin e Shëndetit Publik mbi situatën e koronavirusit në Shqipëri thotë se rritja e rasteve të reja në Shqipëri ka ardhur si pasojë e ndikimit të dy faktorëve, rikthimit nga pushimet si dhe hapjes së bareve dhe restoranteve.

“Ne mbyllëm një javë tjetër me pozitivitet të lartë. Ndërkohë, kemi edhe rritje të personave të shtruar në spital dhe atyre që kanë kërkuar terapi intensive. Pozitiviteti vjen si rrjedhojë e disa ndërhyrjeve, duke filluar që nga kthimi i pushuesve nga periudha e verës”, theksoi ajo e ftuar sot në Dita Jonë, A2.

“Kjo do të kishte një ndikim dhe e ka dhënë një gjë të tillë. Një ndikim tjetër kanë dhënë edhe baret dhe restorantet. Mbas 14 shtatorit, 14 tetori përkoi me një rritje të rasteve të reja. Duhet theksuar se edhe ndërgjegjësimi i popullatës ka pasur një ndikim madhor sa i përket mosrespektimit të masave”, u shpreh Tomini.

Në ditët në vijim Tomini tha se do të rritet numri i testimeve.

“Rrethi i ngushtë i kontakteve me rastet pozitiv na është afruar shumë. Parashikimi është se jo e gjithë popullata mund të infektohet”.

“Ne kemi ndjekur një strategji të rasteve të dyshuara dhe kontakteve të tyre dhe nuk është se kemi gabuar shumë. Studime edhe për një test të shpejt, Akademia e Shkencave, QSUT, i kanë bërë gjatë kësaj periudhe”.

“Kemi qenë nga 400 testime, kemi kaluar në 1200 testime. Strategjia e vjeshtë-dimër do të shtojë numrin e testimeve. Prandaj testimet në vijim do të kenë tendencë të rriten”, u shpreh Eugena Tomini.

/NOA.al