Presidenti Trump sulmon Fauçin: Njerëzit janë lodhur nga Covidi
Transmetuar më 19-10-2020, 20:20

Presidenti i SHBA, Donald Trump, ka sulmuar drejtorin e Institutit Kombëtar të Alergjive dhe Sëmundjeve Infektive, Dr. Anthony Fauci, i cili është një nga më të njohurit në botë sa i përket këshillave kundër koronavirusit.

Donald Trump është shprehur i zhgënjyer prej tij, duke theksuar se njerëzit janë lodhur duke dëgjuar për pandeminë vdekjeprurëse, që ka vrarë më shumë se 215 000 amerikanë.

Trump e konsideron Faucin si një “katastrofë” dhe shton se është i lodhur duke e dëgjuar atë.

Sipas tij, nëse do të dëgjonte Faucim, më shumë se gjysmë milioni njerëz do të kishin vdekur në Shtetet e Bashkuara.

Trump portretizoi rekomandimet e ofruara nga administrata e tij për të zbutur përhapjen e sëmundjes si një bezdi të rëndë.

"Njerëzit janë lodhur nga Covid. Unë kam tubime të mëdha,” tha Trump, duke kryer një telefonatë me stafin e fushatës nga hoteli i tij me emër në Las Vegas, ku ai kaloi dy net.

“Njerëzit janë duke thënë gjithçka. Thjesht na lini rehat. Ata janë lodhur nga kjo. Njerëzit janë lodhur duke dëgjuar Faucin dhe gjithë këta idiotë.”

Fauci ka qenë drejtor i Institutit Kombëtar të Alergjisë dhe Sëmundjeve Infektive që nga viti 1984 dhe është anëtar i Task Forcës së Koronavirusit në Shtëpinë e Bardhë.

Pothuajse në të njëjtën kohë kur Trump po fliste në telefon, Fauci po vlerësohej në Akademinë Kombëtare të Mjekësisë për Udhëheqjen Shembullore gjatë një ceremonie virtuale. Fauci tha se ai ishte “pa fjalë” ndërsa merrte medaljen.

“Kemi shumë sfida përpara nesh dhe nuk mund të mos mendoj se vërtet po kalojmë një kohë që është shqetësuese anti-shkencë në segmente të caktuara të shoqërisë sonë,” tha Fauci.