Transmetuar më 20-10-2020, 12:00

Është shoqëruar me tensione protesta para ministrisë së Jashtme, në vigjilje të vizitës së ministrit të jashtëm të Greqisë Nikos Dendias.

Kreu i PDIU Shpëtim Idrizi tha se deri tani janë shoqëruar 22 persona në polici. Mes tyre është edhe kreu i Lëvizjes Vetëvendosje në Tiranë, Bojken Abazit.

Dega e Lëvizjes Vetëvendosje në Tiranë ka reaguar për shoqërimin e Bojken Abazit nga policia tek Ministria e jashtme ku pritet nga momenti në moment të mbërrijë ministri grek Dendias.

Në reagimin e tyre ata thonë se: Shënjestrimi i Lëvizjes VETËVENDOSJE! dhe i Bojken Abazit tregon për një politikë të fëlliqur që po bën qeveria Rama, duke dashur të ofrojë një dhuratë të dhunshme ndaj vizitorit grek.

Reagimi i plotë i VV, Tiranë: Arrestim i porositur e i padrejtë

Aktivisti dhe drejtuesi i Qendrës së Lëvizjes VETËVENDOSJE! në Shqipëri, Boiken Abazi, është arrestuar nga policia, në rrugë e sipër teksa po shkonte për të marrë pjesë në tubimin paqësor protestues pranë Ministrisë së Punëve të Jashtme.

Ky arrestim është tipikisht i porositur. Arrestimi u krye para se të fillonte tubimi, madje para se Boiken Abazi të mbërrinte në vendin e lajmëruar për tubimin.

Tubimi paqësor protestues i organizuar nga Shoqata “Çamëria” dhe PDIU me rastin e vizitës së ministrit të jashtëm grek në Tiranë synon shtrimin e kërkesave në lidhje me zgjidhjen e çështjes shqiptare të Çamërisë, heqjen e ligjit të luftës dhe delimitimin e drejtë të kufive detarë.

Shënjestrimi i Lëvizjes VETËVENDOSJE! dhe i Boiken Abazit tregon për një politikë të fëlliqur që po bën qeveria Rama, duke dashur të ofrojë një dhuratë të dhunshme ndaj vizitorit grek.

Lëvizja VETËVENDOSJE! është për miqësinë e bashkëpunimin mes popujve, për të drejta evropiane për minoritetet, por mbi të gjitha për shtete të drejta e jo diskriminuese. Për sa kohë shteti grek vazhdon politika diskriminuese e armiqësore ndaj shqiptarëve, ne do të vazhdojmë ta themi të vërtetën, edhe duke protestuar, e Rama nuk mund të na ndalë me arrestime të shënjestruara.

Bëjmë thirrje të lirohet Boiken Abazi një orë e më parë, e të dënohen urdhërdhënësit për përndjekjen politike e shënjestrimin që po na bëjnë!

/NOA.al