Ministri i Diasporës, Pandeli Majko ka publikuar historinë e dëshmores së Atdheut, 17 vjeçares nga Gjakova, e cila u vra nga forcat serbe gjatë betejës së Çabratit.
Nën hashtagun “Liria ka emër”, Majko ka bërë publike vrasjen e adoleshentes shqiptarem, në një kohë kur në Hagë aktualisht po gjykohen drejtues të UÇK-së, për krime lufte.
Yllka Domi u varros nga forcat serbe në një varrezë masive afër Beogradit. Ndryshe nga shumë të zhdukur të tjerë, trupi i saj i pajetë u zbulua në vitin 2003 dhe u varros në vendlindjen, Gjakovë, ku prehen Dëshmorët e Kombit.
Postimi i plotë i Pandeli Majkos: LIRIA KA EMER
Yllka Domi ka lindur në Gjakovë më 17 Qershor 1982. Ajo u bë pjesëtare e Brigadës 137 “Gjakova” të Ushtrisë Çlirimtare të Kosovës.
Yllka humbi jetën më 7 maj 1999 gjatë betejës së Çabratit, e cila po zhvillohej në mes të forcave të UÇK-së dhe ushtrisë serbe.
Dy ditë para vdekjes, Yllka, 17 vjecare, shkroi vargjet e saj të fundit:
“Amanet ju le nëse nuk pritoni.
Të ma shkruani emrin në rërën e detit,
Dhe dy vargje mi shkruani me shkrimin e saj.
Në krahët e valëve të ketë epope të pambaruar.
Dhe arena e kafazit të jetë e hapur.
Përmendore nuk dua…!
Nëse në kurrizin e qytetit gjeni një shkop,
Vendosni afër kokës sime.”
…Ushtarakët serbë trupin e Yllkës bashkë me trupat e tjerë të vrarë në betejë i dërguan në një varrezë masive në Batajnicë (Serbi).
Pas identifikimit të eshtrave nga ekspertët e mjekësisë ligjore, Yllka Domi u rivarros me 23 dhjetor 2003, në kodrën e Çabratit në Gjakovë.
Yllka Domi është shpallur dëshmore e kombit.
Liria ka emrin e të rënëve!/a.m/NOA.al