Një ditë më parë ishin mjekët e njohur të repartit të epidemiologjisë, si dhe kryeministri i vendit Edi Rama, ata që morën të parën vaksinën kundër koronaviorusit, në vendin tonë.

Rreth 60 epidemiologë dhe mjekë të dy spitaleve COVID 1 dhe 2 janë planifikuar që të injektojnë vaksinën anti-COVID në ditën e dytë të procesit të vaksinimit, që ka nisur dje zyrtarisht në vendin tonë, ndonëse me ritme të ngadalta për shkak të numrit të kufizuar të vaksinave që janë siguruar deri tani.

Sipas shefes së Departamentit të Sëmundjeve Infektive në ISHP, Silva Bino, deri më tani nga 50 personat që e kanë injektuar vaksinën në ditën e parë  nuk kanë asnjë shqetësim apo efekt anësor.

“Vaksina ka efekte anësore të cilat shfaqen zakonisht pas dozës së dytë, efektet anësore të vaksinës janë një temperaturë që mund të shkoje deri në 38, dhimbje muskulore, dhimbje kyçesh, dobësi. Zakonisht këto simptoma zgjasin vetëm dy ditë ose një ditë e gjysmë. Nuk shoqërohen as me kollë as me shenja të tjera që ka COVID”, tha ajo.

Doza e dytë merret në harkun e tre javëve nga doza e parë. Shqipëria ka përcaktuar që do të kryejë vaksinimin me skenarin e dy dozave me 3 javë ndërmjet njëra-tjetrës.

Ekspertët thonë se mbrojtja krijohet që me dozën e parë, por derisa të merret edhe doza e dytë, duhet bërë kujdes.

“Mbrojtja më e lartë është pas dozës së dytë, megjithëse kemi një mbrojtje 70 deri në 80% pas dozës së parë. Fillimi mbrojtjes fillon pas javës së parë pasi është marrë doza e parë e vaksinës”.

“Ne po i ruajmë këto doza për të vaksinuar personat që i kemi vaksinuar. Njerëzit do të vaksinohen me dy doza dhe ne ato i kemi të ruajtura për këta persona që po marrin dozën e parë, me qëllim që të kenë mbrojte të plotë”.

Vaksina ka ende pikëpyetje mbi efektin që do të ketë në parandalimin e kalimit të virusit nga një person tek tjetri.

“Vaksinimi sot njihet në lidhje me parandalimin e vdekshmërisë dhe ngarkesës në spitale. Por aktualisht nuk kemi të dhëna të sakta në lidhje me transmetueshmërinë, pra sa e ndalojnë transmetueshmërinë në publik”.

Po cilët duhet ta bëjnë vaksinën dhe cilët jo?

“Personat që kanë kaluar COVID mund ta injektojnë vaksinën sepse e para nuk e dinë nivelin e mbrojtjes dhe ne s’e dimë sa të mbrojnë këto kundërtrupa. Njerëz që kanë alergji nga produktet kozmetike merren në konsideratë, personat që kanë sëmundje autoimune që nuk kanë kundërndikim për vaksinimin, por ajo që dua të them, numri i tyre gjatë provave ka qenë më i ulët”, tha Bino.

Vaksinat anti-COVID po mbahen në kushtet e ngrirjes në Institutin e Shëndetit Publik. Ato transportohen në mjediset e stadiumit ku po kryhet procesi në temperaturën plus dy deri në plus tetë gradë. /a.m/NOA.al