Seriali shumë i famshëm dhe i dashur për publikun, “Sex and the City”, po rikthehet sërish në ekran dhe jo si film por si serial, për t’ia bërë qejfin të gjithëve. Sarah Jessica Parker ka njoftuar rikthimin e “Sex and the city”, teksa protagonistet e serialit do të kenë të njëjtat role që kishin dikur, duke nisur nga Sarah Jessica Parker, Cynthia Nixon dhe Kristin Davis, por nuk do të jetë “Samantha” e Kim Cattrall.

Së fundmi është mësuar se Samantha, që është luajtur nga Kim Cattrall, do të zëvendësohet jo nga një e as nga dy, por nga plot 6 aktore. Thuhet se 3 prej tyre do të shfaqen në serial në mënyrë sporadike dhe të 6 aktoret do të jenë nga etnitete të ndryshme për të promovuar edhe diversitetin e SHBA-ve, që njihet kudo. 6 aktoret pretendohet që të zëvendësojnë dhe mbushin boshllëkun që ka lënë roli i Samanthas, që ka qenë aq shumë i dashur nga publiku.

Më herët shefi i marketingut, Casey Bloys, e justifikoi mungesën e Samantha Jones me faktin se në këtë moshë nuk mund të kesh të gjithë miqtë që kishe në të 30-at.

“Seriali do të paraqesë jetën e grave në të 50-at dhe situatat me të cilat ato përballen në këtë moshë. Disa miqësi mbarojnë e të tjera fillojnë. Disa njerëz vijnë në jetën tënde dhe të tjerë largohen. Miqtë që kishe kur ishe 30 vjeç, mund të mos i kesh kur të jesh 50”-tha ai. /S.H /NOA.al