Misioni i SHBA-ve në OSBE ka dalë me një deklaratë për zgjedhjet e 25 prillit në Shqipëri.

Përgëzohet populli për angazhim në votime, por vihen në dukje problematika si blerja e votës, rrjedhja e të dhënave personale të qytetarëve dhe përdorimi i administratës.

“Ne përgëzojmë Komisionin Qendror të Zgjedhjeve për mbajtjen e një procesi zgjedhor të mirë-organizuar dhe në mënyrë të përshtatshme e transparente, pavarësisht nga sfidat e paraqitura nga pandemia dhe zbatimi i teknologjive të reja”, – thuhet në deklaratë.

“Vëmë re se në këto zgjedhje patëm një zbatim të suksesshëm të Kodit të ri Zgjedhor, rezultat i një kompromisi të mundësuar nga Prezenca e OSBE-së në Shqipëri dhe Komisioni Qendror i Zgjedhjeve (KQZ). Për më tepër, siç u përmend në raportin paraprak të ODIHR, shumica e ndërmjetësuesve të Misionit Ndërkombëtar të Vëzhgimit të Zgjedhjeve (IEOM) përgëzuan sistemin e ri elektronik të identifikimit të votuesve dhe e vlerësuan sistemin si një mënyrë për të lehtësuar rrezikun e votimit të dyfishtë, votimit familjar dhe falsifikimit të zgjedhësve. SHBA-të janë gjithashtu të kënaqura të shohin të gjitha partitë përkatëse të marrin pjesë në zgjedhje, hera e parë që ndodh që nga viti 2017”, – vijon deklarata.

“Ndërsa ka shumë aspekte pozitive të zgjedhjeve parlamentare në Shqipëri, SHBA vëren se gjetjet e misionit vëzhgues të OSBE tregojnë se partia në pushtet ka pasur avantazhe domethënëse nga pushteti saj, përfshirë edhe kontrollin e administratës lokale dhe keqpërdorimit të burimeve administrative. Ne gjithashtu vërejmë se gjetjet e tyre tregojnë për një praktikë të përhapur të blerjes së votave që mbetet ende një problem dhe gjithashtu shprehim shqetësim në lidhje me rrjedhjen e të dhënave personale tejet sensitive, përfshirë edhe preferencat politike të qytetarëve”, – thuhet në deklaratë.

SHBA thotë se organet e hetimit dhe gjyqësori duhet të mbajnë përgjegjës çdo individ që ka shkelur ligjin apo që ka ndaluar vullnetin e qytetarëve të Shqipërisë për të votuar në zgjedhje të lira dhe të ndershme.

“Ne mirëpresim njoftimin e SPAK për hetimet e krimeve zgjedhore”, theksohet në Misionin e SHBA-ve në OSBE.

“SHBA shpreson se në raportin përfundimtar të ODIHR Shqipëria ta përdorë për të përmirësuar më tej proceset zgjedhore. SHBA do të vazhdojë të bashkëpunojë me qeverinë shqiptare për të forcuar më tej bashkëpunimin tonë në demokraci, mbrojtje dhe tregti”, mbyllet deklarata.