Transmetuar më 10-06-2021, 14:33

Policia e Shtetit ka vënë nën sekuestro preventive disa prona që kapin vlerën rreth 3 milionë euro, në pronësi të dy vëllezërve Sallaku dhe të një shtetasi tjetër, raporton noa.al.

Policia tha se në vijim të punës për identifikimin, gjurmimin, gjetjen dhe sekuestrimin e pasurive që rrjedhin nga veprimtaria kriminale në fushën e pastrimit të parave, u bë i mundur finalizimi i hetimeve 3-vjeçare në ngarkim të dy vëllezërve dhe të një shtetasi tjetër, me të cilin dy vëllezërit kanë lidhje shoqërore.

Si rezultat i hetimeve të kryera dhe provave të grumbulluara, Gjykata e Rrethit Gjyqësor Durrës vendosi sekuestron preventive për pronat e shtetasve Gëzim Sallaku, Saimir Sallaku dhe Rabi Kurti, banues në Durrës, prona të dyshuara të përfituara nga veprimtaria kriminale e shtetasit Gëzim Sallaku.

Këto prona janë të regjistruara edhe në emër të shtetasve Saimir Sallaku dhe Rabi Kurti, konkretisht:

– Sekuestro 100% të aksioneve të shoqërisë “GSA Sallaku” sh.p.k, me aktivitet “Import, eksport, tregti autoveturash, kamionësh etj”, me seli në Durrës, me ortak të vetëm dhe administrator shtetasin Gëzim Sallaku;

– 2 apartamente, në Durrës, në emër të shtetasit Gëzim Sallaku;

– 20.600 m2 sipërfaqe toke arë, në Durrës, në emër të shtetasit Gëzim Sallaku;

– 1000 m2 sipërfaqe toke truall, mbi të cilën janë ndërtuar 2 banesa me sipërfaqe 140 m2 secila, në Durrës, në emër të shtetasit Gëzim Sallaku;

– Një godinë banimi dykatëshe dhe 2 apartamente banimi, në Durrës, në pronësi të shtetasit R. K.;

13 automjete të markave të ndryshme në pronësi të shoqërisë tregtare “GSA Sallaku”.

Vazhdon puna nga Njësia e Hetimit të Krimit Ekonomik e Financiar, për identifikimin e pasurive të tjera të këtyre personave dhe lidhjeve të tyre familjare dhe shoqërore.

Shtetasi Gëzim Sallaku ka kryer veprimtari kriminale dhe është dënuar në shtetin italian nga viti 1999 – 2008.

Njësia për Hetimin e Krimit Ekonomik në Drejtorinë Hetimore në Departamentin e Policisë Kriminale, në bashkëpunim me Prokurorinë e Rrethit Gjyqësor Durrës, në vitin 2018, nisur nga disa transferta të dyshimta bankare të shtetasve të sipërpërmendur, ka filluar hetimin për veprën penale "Pastrimi i produkteve të veprës penale ose të veprimtarisë kriminale".

Materialet për ekzekutimin e Vendimit të Gjykatës iu dërguan Prokurorisë pranë Gjykatës së Shkallës së Parë Durrës.

Më 19 shkurt të këtij viti, autoritetet italiane e dëbuan Gëzim Sallakun pasi më herët policia në Brescia e kishte konsideruar person të rrezikshëm dhe të padëshirueshëm. Ai u kthye në Shqipëri ku ka bizneset e veta.

Gjatë periudhës që ishte në Itali, ai u bë objekt hetimi dhe ndalimi në mënyrë të përsëritur me akuza për shitje makinash të vjedhura, falsifiko, mbajtje armësh pa leje, evazion fiskal, trafik lëndësh narkotike, etj.