Bota ka ndryshuar drastikisht me koronavirusin që përçau vendet, i bëri ato individualiste dhe krijoi ndasi sidomos në kurimin e të sëmurëve, shpërndarjen e vaksinave dhe kompensimit të dëmeve ekonomike.

Në sesionin e 76-të të Asamblesë së Përgjithshme të OKB-së në Nju Jork, çështja e pandemisë është pjesë e rëndësishme e diskutimeve.

Në to u evidentua qartë se kjo situatë kërkon menaxhim të kujdesshëm dhe të përbashkët global.

Në fjalimin nëpërmjet videos që mbajti Presidenti kinez Xi Jinping, paraqiti propozimin për zhvillimin global, duke theksuar rëndësinë e bashkëpunimit në përballimin e kërcënimeve e sfidave globale dhe duke nxitur krijimin e bashkësisë me fate të përbashkëta të njerëzimit.

"Tani pandemia ende nuk e ka ndalur përhapjen në mbarë botën, duke e ndryshuar thellësisht shoqërinë njerëzore. Bota ka hyrë në një periudhë të re me luhatje dhe transformim.

Çdo politikan i përgjegjshëm duhet t’i përgjigjet temës së kësaj epoke, duke marrë vendime historike me besim, guxim dhe ndjenjën e misionit," tha presidenti Xi.

Për të përballuar situatën aktuale, me qëllim rikthimin në jetën normale, ai paraqiti një propozim prej katër pikash.

"Së pari, duhet të mposhtim virusin dhe të fitojmë këtë luftë jetike që ka të bëjë me të ardhmen e njerëzimit", – tha presidenti Xi.

Sipas tij, shpërndarja e barabartë dhe e arsyeshme e vaksinave në përmasë botërore është detyra më emergjente.

Kina do të përpiqet të ofrojë 2 miliardë doza vaksinash për botën dhe, në kuadër të dhurimit të 100 milionë dollarëve amerikanë planit COVAX, do t’u ofrojë falas vendeve në zhvillim 100 milionë doza vaksinash.

Ndërkohë, Kina thotë se do të vazhdojë të mbështesë dhe të marrë pjesë në gjurmimin shkencor të origjinës së koronavirusit të tipit të ri, duke kundërshtuar çdo manipulim politik mbi këtë çështje.

"Së dyti, duhet të nxisim rigjallërimin ekonomik për të realizuar një zhvillim më të vrullshëm, më të gjelbër dhe më të balancuar global.  Lidhur me këtë, ai shpalli Nismën për Zhvillimin Global.

"Megjithëse Kina ka vështirësi të mëdha për të realizuar arritjen e kulmit të lëshimit të karbonit brenda vitit 2030 dhe të asnjanësimit të karbonit para fundit të vitit 2060, do të bëjmë përpjekje të jashtëzakonshme brenda mundësive që kemi".

Së treti, duhet të forcohet solidariteti dhe të nxitet zhvillimi i marrëdhënieve ndërkombëtare me respekt të ndërsjellë dhe bashkëpunimi me leverdi të ndërsjellë.

"Ndryshimet dhe problemet janë paevitueshme ndër vendet e botës. Por suksesi i një vendi nuk duhet të nënkuptohet si dështim i një vendi tjetër.  Duhet të ndërtojmë një tip të ri të marrëdhënieve ndërkombëtare në bazë të respektit të ndërsjellë, barazisë, drejtësisë dhe bashkëpunimit me leverdi reciproke, duke bërë përpjekje maksimale për të zgjeruar pikëtakimet e interesave dhe për të krijuar një sinergji sa më të madhe që të jetë e mundshme,” u shpreh ai.

Më tej presidenti kinez tha: "Populli kinez ka synuar gjithmonë paqen, miqësinë dhe harmoninë. Kina kurrë nuk ka kërkuar dhe nuk do të kërkojë hegjemoninë, as të pushtojë apo të ngacmojë vendet e tjera.

Së katërti, kreu i shtetit i Kinës propozoi që duhet të përsosim qeverisje globale, duke adoptuar multilateralizëm të vërtetë. "Në botë ka vetëm një sistem ndërkombëtar, që është me OKB-në në qendër. Ka vetëm një rend ndërkombëtar, që është rendi i bazuar mbi ligje ndërkombëtare. Ka vetëm një set rregullash të marrëdhënieve ndërkombëtare, që është bazuar mbi parimet e Kartës së OKB-së", shtoi ai.

Kurse nënvizoi se OKB-ja duhet të ngulë këmbë në garantimin e një rendi të qëndrueshëm ndërkombëtar, duke shtuar përfaqësueshmërinë dhe fjalët e vendeve në zhvillim mbi çështje ndërkombëtare dhe duke luajtur një rol udhëheqës në shtimin e demokracisë dhe të sundimit të ligjit mbi marrëdhëniet ndërkombëtare.