Emocione të mëdha në stadiumin “Maradona” para ndeshjes së Serie A mes Napolit dhe Lazios. Tifozët dhe klubi blu deshën t’i bëjnë nderimet e duhura “Pibe de Oro”, i cili u nda nga jeta pak më shumë se një vit më parë. Një ceremoni prekëse dhe emocionuese i parapriu ndeshjes kundër bardhekaltërve.

Statuja e Maradonës në stadium

Statuja në kujtim të argjentinasit të vdekur më 25 nëntor të një viti më parë, e inauguruar zyrtarisht jashtë stadiumit tri ditë më parë, është futur brenda stadiumit, ka parakaluar në pistën atletike. Një moment prekës për të gjithë tifozët blu, të cilët shpërthyen me thirrjet “Olè olè olè, Diego, Diego”, në pritje të fillimit të ndeshjes Napoli-Lazio.

Atmosfera ishte mbresëlënëse, me mijëra drita celularësh të ndezura nga tifozët në errësirën e stadiumit, që mban emrin e legjendës argjentinase të futbollit. Instalacioni u zbulua, ndër të tjera, nga presidenti Aurelio De Laurentiis, i rrethuar nga presidenti i FIFA-s, Gianni Infantino, nga ish-padroni blu, Corrado Ferlaino, nga kryebashkiaku Gaetano Manfredi.

Më pas skulptura u transportua përgjatë gjithë pistës së atletikës, ndërsa aktori Gianfranco Gallo lexoi fjalët e shkruara nga Maurizio De Giovanni në kujtim të argjentinasit.

Shumë tifozë dhe ish-shokë skuadre të Maradonës

Të pranishëm në stadium ishin rreth 40 mijë tifozë, të cilët mbërritën shumë përpara fillimit të ndeshjes në “Fuorigrotta”, për të marrë pjesë në ceremoninë e statujës së Maradonës mbi numrin 10. Të pranishëm ishin edhe ish-lojtarë si Beppe Bruscolotti, Salvatore Bagni, Fabio Cannavaro dhe Luigi Caffarelli.

Kujtimi i Pele dhe Careca

Ish-bashkëlojtarët dhe kundërshtarët e kanë kujtuar argjentinasin në një video. "Ishte një vit i trishtuar, ne humbëm Diegon tonë të madh, por ai do të jetë gjithmonë me ne. E falënderoj për gjithçka që ka bërë për ne dhe do ta mbajmë në zemrat tona. Shihemi së shpejti", – thotë Antonio Careca.

“Ai ishte miku im, nuk mund ta harrojmë kurrë, i meriton homazhet që Napoli po ia bën sonte”, – ishte mesazhi i Peles.

Fjalët e Ferlainos

“Me atë Napoli nuk e bëmë gjithë Italinë të ëndërronte, sepse kishim disa armiq. Kur firmosa kontratën e Maradonës në Barcelonë, mund të mendoja për gjithçka, përveç se pas kaq shumë vitesh mund të qëndroja këtu me qytetin që çmendet për Maradonën.

Vërtet, më kujtohet që shkova të marr një uiski në lokal dhe banakieri më tha: I dhamë Napolit një kanaçe, Maradona është i shëndoshë dhe ka bark. Ai uiski mbeti aty dhe nuk kam pirë më në jetë.

Unë jam shumë supersticioz, edhe Aurelio është i tillë, si të gjithë napolitanët. Maradona kishte një të majtë të shkëlqyer, magjike, me të cilën magjepsi botën, por shënoi edhe me të djathtën dhe me kokë”.