Duke iu referuar mësymjes deklarative publike të kryeministrit Edi Rama dhe ministrit të tij të drejtësisë ndaj SPAK-ut, reagimet kanë qenë të shumta. Nuk mund të mungonte as gjykimi i Ylli Manjanit, ish-ministër drejtësie dhe një nga njohësit më të mirë të ligjit në vendin tonë.

Përmes rrjeteve social, ai sugjeron se si i vihet në ndihmë SPAK-ut, nëse e ka vërtet këtë qëllim mazhoranca siocialiste, jo presionin ndaj tij, për të mos u mbytur me dosje të lehta, por të merret me korrupsionin në nivelet e larta dhe krimin e otrganizuar:

"Nëse duan ta ndihmojnë SPAK të bëjë punën për të cilën u krijua, duhet të:

1. T’i kufizojnë me ligj rrethin e zyrtartëve që hetojnë. SPAK ka punë vetëm me zyrtarët e lartë. Po ata të lartët fare. Të gjithë të tjerët t’i hetojë prokuroria e zakonshme.

2. T’i kufizojnë objektin hetimor duke e fokusuar ekskluzivisht te veprat penale të korrupsionit dhe krimit të organizuar. Çdo vepër tjetër penale duhet ta hetojë prokuroria e zakonshme.

3.  T’i ndalohet fillimi i ndjekjes penale mbi bazë kallëzimi partish politike ose kallëzime popullore.

4. BKH duhet të riorganizohet si strukturë e hetimit penal jo vetëm në varësi të SPAK, por edhe në shërbim të Prokurorisë së zakonshme.

SPAK duhet lejuar pa asnjë presion kohor të bëjë hetime të plota. SPAK nuk mund të ketë presionin e politikanëve që duan pushtet me arrestime pa hetime, aq më pak të vuajë hallin e ambasadorëve të huaj që duan rezultate "fake" në Shqipëri, që të kapin një emërim më të mirë në shtetet e tyre.

Kjo është e papranueshme! Gjithashtu e dëmshme për vetë besueshmërinë e drejtësisë. SPAK duhet të ndjekë modelin e antimafias italiane ose edhe të FBI amerikane, ku hetohet gjatë dhe kur provohet vepra fillojnë arrestet.

Nëse SPAK nxiton të bëjë arrestime pa bërë hetime, thjesht po vijon lojën që Prokuroria jonë ka bërë gjithmonë, gjykimet popullore që çojnë në dështimin e drejtësisë së ligjit.

Mendoj se SPAK i duhet dhënë një shans real që të performojë ashtu siç duhet dhe jo siç i kërkohet sipas interesit të ditës. Nëse e kanë seriozish, kjo duhet të jetë rruga e ndreqjes së problemit dhe jo llo llo llo-të politike për propagandë".