TIRANE- Ka dështuar projekti i hedhjes në hapësirë i satelitëve "Albania 1" dhe "Albania 2". Por është gjetur ‘shkaktari’. Adrian Kamenica, sekretari i përgjithshëm i Ministrisë së Mbrojtjes është shkarkuar nga detyra si përgjegjës që nuk realizoi projektin.
Ai është zëvendësuar nga Geraldina Prodani. Vendimi për shkarkimin e tij është firmosur nga ministri i Mbrojtjes.
Por çfarë ishte projekti Rama për satelitët?
Kryeministri Edi Rama njoftoi vjeshtën e kaluar se Shqipëria do të dërgonte në orbitë dy satelitë ‘Albania 1’ dhe ‘Albania 2’. I pari parashikohej të lëshohej në mars 2022 dhe i dyti rreth dy muaj më pas, në qershor. Detyra iu la ministrisë së Mbrojtjes, e cila do të realizonte detyrat për të përmbushur misionin. Siç edhe kuptohet, një gjë e tillë nuk ka ndodhur dhe tashmë përgjegjësi është gjetur.
Megjithatë Kryeministri ka deklaruar se “vonesat nuk janë në dorën e tij”, por nuk është hequr dorë nga ky plan.