Kosovë- Publikohen fotot dhe emrat e të rinjve që dyshohet se përdhunuan një të mitur 11-vjeçare në Prishtinë.

Nën akuzë janë Ekrem Rexhepi, Gent Rexhepi, Xhabir Salihu, Gentrit Jashari dhe Shkëlqim Kameri.

Në Kosovë, por jo vetëm, ka pasur reagime të forta ndaj precedentit në fjalë.

Që nga bërja publike e këtij rasti, të shumtë kanë qënë personazhe të njohur të botës së showbizit, shoqërisë civile, politikanë dhe qytetarë të thjeshtë, kanë bërë thirrje në rrjetet sociale që emrat dhe fotot e autorëve të bëhen publike.

Sot në 2 kryeqytetet shqiptarë, Prishtinë e Tiranë, do të zhvillohen protesta që të kërkohet drejtësi në mënyrë që dhunuesit ta marrin ndëshkimin e merituar. Në Prishtinë protesta do të mbahet në Sheshin “Zahir Pajaziti”, e ndërsa në Tiranë në sheshin ‘Nënë Tereza’.

Ngjarja raportohet të ketë ndodhur më 27 gusht nga ora 17:30 deri në orën 00:30. Dhunimi i vajzës së mitur ka nisur në parkun në lagjen “Arbëria” në Prishtinë, për të vazhduar në një vend tjetër të panjohur. Sipas dyshimeve të para, fillimisht tre të miturit, Gent Rexhepi, Xhabir Salihu, Gentrit Jashari, keqtrajtuan seksualisht vajzën e mitur, ndërsa më pas ka shkuar edhe 26-vjeçari Ekrem Rexhepi, të cilin e ka thirrur vëllai i tij Gent Rexhepi. Në një zonë, 26-vjeçari ndaloi makinën në një tjetër vend dhe kreu marrëdhënie seksuale me të miturën. Në dëshminë që ka dhënë vetë ajo në polici, ka treguar se ishte në park kur iu afruan 3 persona duke e ngacmuar me fjalë. Ndonëse pretendon se nuk i ka kthyer përgjigje dhe ka vijuar rrugën e saj, njëri i është afruar dhe e ka prekur.

E mitura është dërguar në një qendër strehimore, ndërsa raportohet se deri më tani dy persona, shtetas kosovarë janë arrestuar si autorë të dyshuar. Mësohet se Ekrem Rexhepi ka qenë i akuzuar për veprat penale “Vjedhja e rëndë”, “Vjedhja e pyllit” dhe “Dhuna në familje”.