KOLUMBI – Tragjedi në një fushë futbolli në Kolumbi.

Rrufeja në një ndeshje futbolli ka lënë të vdekur 5 persona dhe ka plagosur 15 të tjerë. Ngjarja mësohet të ketë ndodhur në mbrëmjen e të shtunës, teksa një 16-vjeçar është mes të vrarëve në këtë ngjarje.

Sipas mediave lokale, ngjarja ka ndodhur në fshatin Loma Larga, në lokalitetin Quilcace. Njerëzit ishin mbledhur në stadium për të marrë pjesë në një lotari, si dhe për të ndjekur një ndeshje futbolli të kategorive të ulëta.

Të plagosurit morën menjëherë ndihmën e parë nga mjekët, teksa më pas u transferuan në një qendër mjekësore për trajtim të mëtejshëm, shkruan joq-albania.

Sipas Organizatës Botërore të Shëndetësisë (OBSH), goditjet nga rrufeja janë përgjegjëse për rreth 6.000 vdekje në mbarë botën çdo vit. Amerika e Jugut është ndër rajonet që priren të kenë numrin më të madh të vdekjeve nga rrufetë.